مامۆستایانی ناڕازی لە بەیاننامەیەکدا هۆشداریاندایە دەسەڵاتدارانی هەرێم دەڵێن ئەگەر حکومەت بەدەم داواکارییەکانیانەوە نەچێت دەست بە بایکۆتی خوێندن دەکەنەوە.
نوێنەری مامۆستایانی چەند شار و شارۆچکەیەکی هەرێمی کوردستان ڕایانگەیاند، سەرەڕای بەردەوامیان لە وانەوتنەوە و کارکردنیان بۆ پەکنەکەوتنی کەرتی خوێندن، بەڵام تائێستا حکومەت بەدەم داواکارییەکانیانەوە نەهاتووە و هەنگاوی کرداری نەگیراوەتەبەر.
لە کۆنگرەیەکی ڕۆژنامەوانیدا وتیان ئەوان چەند داواکارییەکیان هەیە لەوانە کاراکردنی پەرلەمان و کابینەی نوێ و لابردنی سیستەمی پاشەکەوتی موچە و نەهێشتنی دەستوەردانی حزبی لە ناوەندەکانی خوێندندا و هەروەها دانانی وەزیرێکی بێلایەن بۆ وەزارەتی پەروەردە لە کابینەی نوێدا.
ئاماژە بۆ ئەوەش دەکەن لە ئەگەری جێبەجێنەکردنی داواکارییەکانیان، دوبارە بایکۆتی خوێندن دەکەن لە ناوەندەکانی خوێندندا.