لەبارەی هەرزان بوونی نرخی کارتی مۆبایل ڕوونکردنەوە دەدرێت

‌
وەزیری گواستنەوە و گەیاندنى حكوومه‌تى هه‌رێمى كوردستان لەبارەی هەرزان بوونی نرخی کارتی مۆبایل ڕوونکردنەوە دەدات و ڕایدەگەیەنێت داوایان لە حکوومەتی عێراق کردووە، نرخی کارتی مۆبایل لە ھەرێمی کوردستان کەم بکەنەوە.

ئانۆ جەوھەر، وەزیری گواستنەوە و گەیاندنی حکومەتی هەرێم لەبارەی داشکاندنی نرخی کارتى مۆبایل بە ڕۆژنامەنوسانی ڕاگەیاند "وەزارەتەکەمان نووسراوێکی ئاراستەی حکوومەتی عێراق کردووە، ئەو باجەی لەسەر کارتی مۆبایلە لە ھەرێمی کوردستان کەم بکرێتەوە، چونکە به‌ به‌راورد عێراق، دوو ھێندە لەسەر ھەرێمی کوردستان دەکەوێت".

باسى له‌وه‌ش كرد "ئەو ھۆکارانەی کە بوونە ھۆی دانانی ئەو باجە لەسەر کۆمپانیاکانی پەیوەندی وەک شەڕی داعش و دابەزینی نرخی نەوت نەماون، بۆیە پێوستە ئەو باجە لەسەر کۆمپانیاکان لاببرێت بە تایبەت ھەرێمی کوردستان".

وەزیری گواستنەوە و گەیاندن ئاماژه‌ى به‌وه‌ش دا، بەپێى ئەو یاسایە کە باجەکە دانراوە، جیاوازی لە سیستەمی مووچەی ھەردوو حکوومەت ھەیە بە جۆرێک ئەگەر لە %20 لەسەر فەرمانبەرانی عێراق بێت ئەوا دوو ھێندە لەسەر ھەرێمی کوردستان دەکەوێت.

لە ساڵی 2015دا بە بڕیاری حەیدەر عەبادی بۆ کەمکردنەوەی کورت ھێنانی بودجە باجی زیاد خرایە سەر کۆمپانیاکانی پەیوەندی، کۆمپانیاکانیش نرخی کارتیان بۆ سەروو ھەزار دینار زیاد کرد.
 



PM:01:05:05/11/2019






ئەستێرەکان

Spee Media