وەزارەتی ناوخۆ هۆشداریەکی توند دەدات بە سەرپێچیکاران

‌
وه‌زاره‌تی ناوخۆی حكوومه‌تی هه‌رێمی كوردستان ئەمشەو، ٢٩ی ئازار هۆشدارییەكی توند له‌ باره‌ی سه‌رپێچیكردن له‌ بڕیار و رێنماییه‌كانی تایبه‌ت به‌ خۆپارێزی دەدات بەو کەسانەی سەرپێچیدەکەن لە رێنومانییەکانی تەندروستی.


لە راگەیەندراوێكدا وەزارەتی ناوخۆی حكوومه‌تی هه‌رێمی كوردستان، هۆشدارییه‌كی توندی داوەتە ئه‌وانه‌ی به‌ ئاشكرا داوای سه‌رپێچیكردنی یاسا و رێنماییه‌كانی خۆپاراستن لە ڤایرۆسی كۆرۆنا ده‌كه‌ن.


لەو راگەیاندنەی وەزارەتی ناوخۆدا هاتووە "له‌ كاتێكدا سوپاسی خۆڕاگری و پێگیربوونی هاووڵاتییانی هه‌رێمی كوردستان ده‌كه‌ین و داواشیان لێ ده‌كه‌ین له‌ پێناو سه‌لامه‌تی خۆیان و به‌رژه‌وه‌ندیی گشتی به‌رده‌وامبن له‌ پابه‌ندبوون به‌ رێكار و رێنماییه‌ ته‌ندروستییه‌كان بۆ ئه‌وه‌ی به‌ هاوكاری هه‌موو لایه‌ك ئه‌م دۆخه‌ سه‌خته‌ تێپه‌ڕێنین".


هەروەها باس لەوەش کراوە "به‌ داخه‌وه‌ له‌م چه‌ند رۆژانه‌دا خه‌ڵكانێكی نابه‌رپرس به‌ ئاشكرا داوای سه‌رپێچیكردنی یاسا و پابه‌ند نه‌بوون به‌ رێكار و رێنماییه‌ ته‌ندروستییه‌كان ده‌كه‌ن و هانی خه‌ڵك ده‌ده‌ن بۆ خۆپیشاندان و گردبوونه‌وه‌ و ده‌یانه‌وێت بۆ مه‌به‌ستی تایبه‌تی خۆیان، به‌رژه‌وه‌ندیی گشتی رووبه‌ڕووی مه‌ترسی بكه‌نه‌وه‌ و ئه‌مه‌ هه‌وڵێكه‌ بۆ بڵاوكردنه‌وه‌ی ڤایرۆسی كۆرۆنا و تاوانێكه‌ به‌رامبه‌ر به‌ خه‌ڵكی كوردستان".


لەو راگەیاندنەشدا هاتووە "هۆشدارییه‌كی توند ده‌ده‌ینه‌ هه‌موو ئه‌وانه‌ی به‌ ئاشكرا داوای سه‌رپێچیكردنی یاسا و رێنماییه‌كان ده‌كه‌ن كه‌ هه‌ر سه‌رپێچی و پێشێلكاری و گردبوونه‌وه‌یه‌ك، رووبه‌ڕووی لێپێچینه‌وه‌ و سزای یاساییان ده‌كاته‌وه‌، چونكه‌ به‌م كاره ته‌ندروستیی خه‌ڵك و به‌رژه‌وه‌ندیی گشتی دووچاری مه‌ترسییه‌كی زۆر ده‌كه‌نه‌وه‌. داواش له‌ داواكاری گشتی ده‌كه‌ین كه‌ رێكاری پێویست به‌رامبه‌ر هه‌ر سه‌رپێچیكارێك و پێشێلكردنێكی رێكار و رێنماییه‌كان بگرێته‌به‌ر".
 



PM:08:23:29/03/2020






ئەستێرەکان

Spee Media