شاسوار عەبدولواحید سەرۆکی جوڵانەوەی نەوەی نوێ دەڵێت " ئەم وەزعە وا ناچێتە سەر و تا سەر ئاوها بێدەنگی بەردەوام نابێت، نە خەڵک تا سەر وا بێدەنگ دەبن و نە ئێمەش بێدەنگ دەبین".
لە نووسینێکدا لە تۆڕە کۆمەڵایەتیەکان، بەناونیشانی (ئەم وەزعە وا ناچێتە سەر و تا سەر ئاوها بێدەنگی بەردەوام نابێت ) شاسور عەبدولواحید سەرۆکی جوڵانەوەی نەوەی نوێ نووسیوویەتی" ئەمەی ئێستا لەبەردەم هەرێمدایە دوا دەرفەتە بۆ ڕککەوتن لەگەڵ بەغداد، چونکە نە خەڵک تا سەر وا بێدەنگ دەبن و نە ئێمەش بێدەنگ دەبین".
لەبارەی دۆخی هەرێمەوە دەڵێت " وەزعی خەڵک خراپە، حکومەت و موئەسەساتمان نەماوە، هیج رێگایەک لەبەردەم یەکێتی و پارتیدا نییە جگە لە رێککەوتن لەگەڵ بەغداد، شەفافکردنی مەلەفی نەوت، نەهێشتنی کۆمپانیای حیزبی و وازهێنان لە باج و سەرانە سەندن لە لایەن کۆمپانیای حیزبی، وە کارکردن بۆ هەڵبژاردنی راستەقینە و بونی دامەزراوەی راستەقینە بۆ چاودێری دەسەڵات".
دەربارەی رێگاچارە، سەرۆکی جوڵانەوەی نوێ دەڵێت " جگە لەم هەنگاوانە هیچ هەنگاو و رێگایەک تر نییە لەبەردەم یەکێتی و پارتی بۆ مانەوەیان و بەردەوامبونیان لە سیستەمی سیاسی هەرێم، بە پێچەوانەوە چارەنوسیان ١٦ ی ئۆکتۆبەرێکی تر و پەیامی پشت فیلمە ئێرانیەکەیە."
سەرۆکی نەوەی نوێ پێشبینی دەکات " چارەنوسیان یان راپەرینی جەماوەرییە یان پشتیوانی نێودەوڵەتی بۆ چاککردنی سیستەمی بەڕێوەبردنە لە هەرێم، یان هاتنی سوپای بێگانەیە یاخود هاتنی سوپای عێراقییە بۆ ئەم ناوچانە ، جا ئەمرۆ بێت یان ١٠ ساڵی تر بێت یەکێک لەم چوار ئیحتیمالە رودەدات ئەگەر ئەم دەسەڵاتە کوردییە خۆی باش نەکات و لایەنی کەمی خزمەتگوازری و دیموکراسیەت فەراهەم نەکات. وە دڵنیا بن کە نامێنن لە حوکمڕاندا بەم شێوەیە".
لە کۆتاییدا شاسوار عەبدولواحید دەڵێت " ئەوەی لەسەرمانە ئێمە ئێستا دەیڵێین و ئاگادارتان دەکەینەوە، وە دەسەڵاتدارانیش ئاگادار دەکەینەوە کە ئێمە دانانیشین و بێ دەنگ نابین لەم دۆخ خراپییەی خەلک و ئەم بێ موچەییە و ئەم شکستە گەورەیەی حوکمڕانی پارتی و یەکێتی".