لە ٦ مانگی رابردوودا بۆ ساڵی ٢٠٢٤(١٥٧ هەزار و ٨٧٢) حاڵەتی هاوسەرگیری لە عێراق تۆمارکراوە %٧٤ی جیابوونەوەكان لەدەرەوەی دادگاكان بووە، هەروەها (٣٦ هەزار و ٩٨١) حاڵەتی جیابوونەوە تۆمار کراوە.
ئەنجومەنی باڵای دادوەری عێراق، ئامارەکانی لە ٦ مانگی رابردوودا بۆ ساڵی ٢٠٢٤ لەسەر ئاستی (١٥) پارێزگاکەی عێراق، تایبەت بە ژمارەی (هاوسەرگیری و جیابوونەوە) بڵاوی کردوونەتەوە، بە گوێرەی ئامارەکان " لە نیوەی یەکەمی ساڵی (٢٠٢٤)دا ئامارەکان دەگاتە (١٥٧ هەزار و ٨٧٢) حاڵەتی هاوسەرگیری تۆمارکراو، کە (١٤٠ هەزار و ٣٩١) گرێبەستیان بە ڕێژەی (٨٩%) لە دادگاکان و (١٧ هەزار و ٣٩١) حاڵەتیان بە ڕێژەی (١١%) لە دەرەوەی دادگاکان ئەنجام دراوە و دواتر لە دادگا پەسەند کراون."
لە ئامارەکاندا هاتووە کە " (٣٦ هەزار و ٩٨١) حاڵەتی جیابوونەوە تۆمار کراوە. (٧٤%)ی جیابوونەوەکان لە دەرەوەی دادگاکان یەکلاکراونەتەوە، کە (٢٧ هەزار و ٣١٥) کۆی حاڵەتەکان بوە، و تەنها (٢٦%)ی جیابوونەوەکان بە بڕیاری دادگا یەکلاکراونەتەوە کە ژمارەیان (٩ هەزار و ٦٦٦) کەیس بووە".
بە گوێرەی ئەو ئامارانە دادگای تێهەڵچوونەوەی رەسافە لە پارێزگای بەغداد زۆرترین رێژەی هاوسەرگیری و دادگای تێهەڵچوونەوەی کەرخ هەر لە پارێزگای بەغداد، بەرزترین رێژەی جیابوونەوەی تێدا تۆمار کراوە.
هەروەها دادگای تێهەڵچوونەوەی پارێزگای موسەننا لەسەر ئاستی پارێزگاکانی عێراق کەمترین رێژەی هاوسەرگیری و کەمترین رێژەی جیابوونەوەی تێدا تۆمار کراوە.