سەرۆک وەزیرانی عێراق و سەرۆکی هەڵبژێردراوی ئەمریکا جەخت لە ویستی درێژەدان بە هاوبەشیی ستراتیجیی نێوان هەردو وڵات و بەهێزکردنی پەیوەندییە دوقۆڵییەکان دەکەنەوە..
نوسینگەی محەمەد شیاع سودانی، سەرۆک وەزیرانی عێراق بڵاوی کردەوە" بەبۆنەی سەرکەوتنی لە هەڵبژاردنی سەرۆکایەتیی ئەمریکا، سودانی پەیوەندییەکی تەلەفۆنی لەگەڵ دۆناڵد ترەمپ سەرۆکی هەڵبژێردراوی ئەمریکا ئەنجام داوە و تێیدا پیرۆزبایی خۆی ئاراستەی سەرۆک و گەلی ئەمریکا کردوە".
بەگوێرەی ڕاگەیەنراوەکە، لە پەیوەندییەکەدا، هەردولا جەختیان لە درێژەدان بە هاوبەشیی ستراتیژیی و پتەوکردنی پەیوەندییە دووقۆڵییەکان کردەوە، نەک تەنیا لە ڕوی ئەمنی، بەڵکو لە بواریی ئابوریی، وزە و تەکنەلۆجیاشدا، پەیوەندییەکان بەهێزتر بکەن.
هەر بەپێی ڕاگەیەنراوەکە، ترەمپ ویستی پێکەوە کارکردنی لەگەڵ سودانی نیشان داوە و چاویشی لەوەیە لە نزیک ماوەدا یەکتر ببینن و پەیوەندییەکانی نێوان واشتۆن و بەغداد تاوتوێ بکەن.
لای خۆشییەوە سودانی، دوپاتی کردەوە ئومێدی بە بەڵێنەکانی ترەمپ هەیە کە لە کاتی بانگەشەی هەڵبژاردن، باسی لە کۆتاییهێنان بە جەنگی ڕۆژهەڵاتی ناوەڕاست دەکرد.