حکومەتی عێراق رایدەگەیەنێت کە دەستوەردانی سەربازی لە سوریا ناکات.
باسم عەوادی وتەبێژی حکومەتی عێراق ئەمشەو ٦ ی کانوونی یەکەم لە لێدوانێکی رۆژنامەوانیدا رایگەیاند:
- ئەوەی لە سوریا دەگوزەرێت ئاڵۆزە و ئاسایشی نەتەوەیی ئەو وڵاتە کاریگەری لەسەر عێراق هەیە.
- کردەوەی سیاسی و دیپلۆماسی و مرۆیی بۆ ڕووبەڕووبوونەوەی پێشهاتەکان بەهێزتر دەکەین.
- دابەشبوونی سوریا هێڵی سوورە بۆ عێراق.
- دەبێت ڕێوشوێنی سیاسی بۆ کۆنتڕۆڵکردنی قەیرانەکانی سوریا بگیرێتەبەر.
لە رووی دۆخی ئابوریشەوە، وتەبێژی حکومەت باسم ئەلعەوادی" ئێمە بەرکەوتەی قەیرانی دارایی و سیاسی نەبووین و ئەگەر ڕووداوەکانی غەززە نەبوایە، دۆخەکەمان باشتر دەبوو".
هەروەها دەشڵێت " عێراق توانی ئەو تەحەدایانەی ڕووبەڕووی ناوچەکە بووەوە تێپەڕێنێت".
ئەم لێدوانانەی وتەبێژی حکومەتی عێراق لە کاتێکدایە کە ئەمڕۆ لە بەغدا کۆبوونەوەیەکی وەزیرانی دەرەوەی سوریا و عێراق و ئێران بەڕێوەچوو، لەدوای کۆبوونەوەکە فواد حسێن بە میدیاکانی راگەیاند کە کۆبوونەوەیەکی فراوانتر لەگەڵ چەند وڵاتی تردا لە بەغدا لەسەر پرسی سوریا سازدەکەین.