ئەمڕۆ پێنج شەممە ئەنجوومەنی باڵای دادوەری عێراق ئامارێکی لەبارەی دۆسیەی هاوسەرگیری و جیابوونەوە لە سەرجەم پارێزگاکان جگە لە هەرێمی کوردستان بڵاوکردەوە کە لە مانگی ئازاردا نزیکەی ٢٣ هەزار گرێبەستی هاوسەرگیری و زیاتر لە چوار هەزار حاڵەتی جیابوونەوە تۆمارکراون.
ئەنجومەنەکە لە ئامارێکدا ئاماژەی بەوەکردووە، بەغدای پایتەخت لە پێشەنگی لیستی گرێبەستی هاوسەرگیریدایە کە شەش هەزار و ٣٩٥ گرێبەست و هەزار و ٧٩٩ حاڵەتی جیابوونەوەیان هەیە.
لە کاتێکدا پارێزگای موسەنا کەمترین گرێبەستی هاوسەرگیری هەبووە و گەیشتووەتە ٥٩٤ گرێبەست و کەمترین ڕێژەی جیابوونەوەش بووە، کە تەنها ٧٨ حاڵەت بووە.
بەپێی ئامارەکەی ئەنجومەنی باڵای دادوەری، بەگشتی لە مانگی ڕابردوودا ٢٢ هەزار و ٩٦٧ گرێبەستی هاوسەرگیری لە عێراقدا ئەنجامدراوە، لە بەرامبەریشدا، چوار هەزار و ٩٧٤ حاڵەتی جیابوونەوە تۆمارکراوە.