پێنجشەممە ٢٥ی ئەیلولی ٢٠٢٥، کۆمیسیۆنی هەڵبژاردنەکانی عێراق سزای دارایی بەسەر بەشێک لە بەرپرسانی عێراق سەپاند کە لە ناویاندا سودانی، مالیکی، مەندەلاوی، سامەڕائی و ئەعرەجیدا هەیە.
جومانە غەلای، وتەبێژی کۆمیسیۆنی باڵای سەربەخۆی هەڵبژاردنەکانی عێراق ڕایگەیاند'' کۆمسیۆن سزای دارایی بەسەر محەممەد شیاع سودانی، نوری مالیکی، موحسین مەندەلاوی، موسەننا سامەڕائی، ئەحمەد حەسەدی و بەها ئەعرەجیدا سەپاند.''
ئەمە لەکاتێکدایە، دوێنێ ئەنجوومەنی کۆمیسیاران لیستی ناوی ئەو کاندیدانەی پەسند کرد کە بەهۆی سەرپێچییەوە سزای داراییان بەسەردا سەپێندراوە، بەهۆی ئەوەی پێش دەستپێکردنی کاتی بانگەشەی هەڵبژاردن، درووشمی حیزبی و وێنەی تایبەتیی خۆیان هەڵواسیوە.
غەلای دەڵێت'' سزای هەر یەکێکیان دوو ملیۆن دینارە و پێویستە پارەکە رادەستی نووسینگەی کۆمیسیۆن لە پارێزگاکەی خۆیان بکەن و ئەگەر پارەکە نەدەن، ئەوا لەو بڕە پارەی بارمتەیە وەردەگیرێت کە پێشتر داویانە بە کۆمیسیۆن."