چوارچێوەی هەماهەنگی سوپاسی گەلی عێراق و لایەنەکان دەکات بۆ بەڕێوەبردنی پرۆسەی هەڵبژاردنی عێراق و دەڵێت" پابەند دەبین بە ڕێزگرتن لە وادە دەستوورییەکان بۆ پێکهێنانی حکومەت".

چوارچێوەی هەماهەنگی لە دوای کۆتاییهاتنی پرۆسەی دەنگدان، لە ڕاگەیەندراوێکدا سوپاسی گەلی عێراقی کرد بۆ بەشداریکردنیان لە هەڵبژاردندا و وتی" کە بەشداریی هۆشیارانە و بەرپرسیارانەی خەڵک لە هەڵبژاردنەکاندا، ئیرادەی نیشتمانیی ئازاد بەرجەستە دەکات."

لە ڕاگەیەندراوەکەدا هاتووە کە ئەم بەشدارییە، ڕەنگدانەوەی پابەندبوونی گەلە بە چەسپاندنی دیموکراسی و پاراستنی یەکڕیزی و سەقامگیریی وڵات.

چوارچێوەی هەماهەنگی دووپاتیکردەوە کە پابەند دەبن بە:

ڕێزگرتن لە وادە دەستوورییەکان بۆ پێکهێنانی حکومەت.

ڕێزگرتن لەو ئەنجامانەی کە لە دەنگدانی خەڵکەوە دەرچوون.

ئامانجیان ئەوەیە کە حکومەتێکی نوێ پێکبهێنرێت کە "گوزارشت لە ئیرادەی خەڵک بکات و وەڵامی خواستەکانیان بداتەوە بۆ چاکسازی، خزمەتکردن و سەقامگیری."

لە کۆتاییدا، لە راگەیەنراوەکەدا هاتووە" چوارچێوەی هەماهەنگی سوپاسی هەموو ئەو لایەنانە دەکەین کە ڕۆڵیان لە سەرخستنی پرۆسەکەدا هەبوو، لەوانە:

کۆمیسیۆنی باڵای سەربەخۆی هەڵبژاردنەکان.

هێزە ئەمنییەکان.

دەزگاکانی ڕاگەیاندن.

چاودێرە ناوخۆیی و جیهانییەکان."

ئەمڕۆ ١١ تشرینی دووەم ٢٠٢٥، پرۆسەی هەڵبژاردنی گشتی بۆ ئەنجومەنی نوێنەرانی عێراق بەڕێوەچوو، کە ٢٠ ملیۆن و ٦٣ هەزار و ٧٧٣ کەس لە عێراقدا مافی دەنگدانیان هەبوو، و بڕیارە سبەی ئێوارە ئەنجامی بەرایی هەڵبژاردنەکە رابگەیەنرێت.