بە گوێرەی پێشبینییەکانی دەستەى کەشناسیی عێراق تا ڕۆژی چوارشەممە بارانبارین لە ناوچەکانی عێراق بەردەوام دەبێت و هەندێک کات رەشەباشی لەگەڵ دەبێت و پلەکانی گەرماش بۆ نزیکەی بەستن دادەبەزن.

دەستەى کەشناسیی عێراق پێشبینییەکانی بۆ چەند رۆژی داهاتوو خستەڕوو و دەڵێت" ئاسمان لە ڕۆژی یەکشەممە لە ناوچەکانی ناوەڕاست و باکوور ڕوون دەبێت و لە هەندێک ناوچەی باشووریش نیمچە هەور دەبێت، لە ناوچەی باکوور و هەرێمى کوردستانیش هەورى تەواو دەبێت".

ئاماژە بەوەشکراوە "رۆژی دووشەممە، کەشوهەوا نیمچە هەور دەبێت، جگە لە بەشەکانی ڕۆژئاوا و ناوەڕاست، کە هەور دەبێت لەگەڵ ئەگەری بارانبارین لە شەودا، هەروەها تەمێکی مامناوەند لە ناوچەکانی ناوەڕاست و باکوور و هەرێمى کوردستان دروست دەبێت ، پلەکانی گەرماش لە ناوچەکانی ناوەڕاست و باکور هاوشێوە دەبێت و لە ناوچەکانی باشووریش کەمێک دادەبەزێت".

دەستەکە راشیگەیاند "کەشوهەوای ڕۆژی سێشەممە نیمچە هەور دەبێت، جگە لە بەشەکانی ڕۆژئاوا و ناوەڕاست، کە هەور دەبێت لەگەڵ ئەگەری بارانبارین لە شەودا، ئەمە جگە لەوەى تەمێکی مامناوەند لە سەرانسەری وڵاتدا دروست دەبێت، پلەکانی گەرماش لە ناوچەکانی ناوەڕاست و باشوور هاوشێوە دەبن و لە ناوچەی باکوور و هەرێمى کوردستان کەمێک دادەبەزێت."

دەشڵێت "کەشوهەوای ڕۆژی چوارشەممە بەگشتی هەور دەبێت لەگەڵ بارانبارینی لە ناوچەی باشوور و ناوچەکانی ڕۆژئاوا و ناوەڕاست، هەندێکجار ڕەشەبای لەگەڵدا دەبێت، پلەکانی گەرماش هاوشێوەی پلەکانی گەرماى رۆژانى رابردوو دەبێت".