لە ساڵڕۆژی دامەزراندنی سوپای عێراق، سەرۆک وەزیران جەخت دەکاتەوە کە دەبێت چەک تەنها لە دەستی دەوڵەتدا بێت، لە لایەکی دیکەوە کەتیبەکانی حزبوڵای عێراق راگەیاندراوێکی بڵاوکردەوە و دەڵێت" عێراق دەبێت خاوەنی بڕیاری ئازادی خۆی بێت و کۆنترۆڵی خاک و ئاسمانی وڵات بکات".
سێ شەممە، ٦ کانوونی دووەم ٢٠٢٦، لە کاتێکدا تەمەنی سوپای عێراق دەبێتە ١٠٥ ساڵ و ئەمڕۆ ساڵڕۆژی دامەزاراندنی سوپایە، محەمەد شیاع سودانی، سەرۆک وەزیرانی عێراق راگەیاندراوێکی بڵاوکردەوە و ڕایگەیاند "بەردەوامین لە کارکردن بۆ بەهێزکردنی هێزی دەوڵەت لە ڕێگەی پاراستنی ئاسایش و هێشتنەوەی چەک تەنیا لە دەستی دەوڵەت، ئەوەش بە جێبەجێکردنی کارنامەی حکومەت و گونجان لەگەڵ بانگەوازی مەرجەعی باڵا".
کەتایبەکانی حزبوڵای عێراقیش ڕاگەیاندراوێكیان بڵاوکردەوە و دەڵێن "براکانمان لە مقاوەمەی عێراقی هەڵوێستی خۆیان لەسەر چەکی کەرامەت و شکۆ روونکردەوە و وەک هەمیشە بەرژەوەندیی نەتەوە دەخەنە پێش هەموو بەرژەوەندییەک".
بە پێی لێدوانێکی فایەق زێدان، سەرۆکی ئەنجومەنی باڵای دادوەری تا ئێستا ئەو گروپانەی ئامادەن چەکەکانیان سنوردار بکەن بریتین لە " عەسائیبی ئەهل حەق، کەتیبەکانی ئیمام عەلی، کەتیبەکانی سەیدولشوهەدا و کەتیبەکانی ئەنسارولڵا ئەوفیا".
کەتیبەکانی حزبوڵای عێراق کە لەلایەن ئەبو مەهدی موهەندیسەوە دامەزرێنراوە، بە فەرمی بەشێکن لە دەستەی حەشدی شەعبی و لەناو ئەو دەستەیەدا خاوەنی لیواکانی ٤٥ و ٤٦ و ٤٧ـن و چەک دانانیان ڕەتکردۆتەوە کە ماوەی چەند مانگێکە داواکاری سەرەکی حکومەتی ئەمریکایە لە دەسەڵاتدارنی عێراق، کە دەبێت سەرجەم ئەو گروپە چەکدارانەی لە عێراقدان چەکیان لێوەربگیرێت و سنورداربکرێن بە تایبەت ئەو گروپانەی هەڕەشەن بۆ سەر بەرژەوەندییەکانی ئەمریکا لە عێراق.