سەباح نوعمان، وتەبێژی فەرماندەی گشتی هێزە چەکدارەکانی عێراق، رایگەیاند" ئێوارەی ئەمڕۆ جارێکی تر گرووپە لە یاسا دەرچووەکان باڵیۆزخانەی ئەمریکایان لە بەغداد کردە ئامانج، ئەم کارە ئیدانەکراوە لە لایەن دەوڵەتەوە و کردەوەیەکی ئاشکرای تیرۆریستییە دژ بە سەروەری و شکۆی عێراق دەکات".
سەباح نوعمان لە راگەیەندراوێکدا ئاماژەی بەوەکردووە، بەئامانجکردنی بارەگای نوێنەرایەتییە دیپلۆماسییەکان، کارێکی نابەرپرسانەیە و پێشێلکارییەکی مەترسیداری ڕێککەوتنە نێودەوڵەتییەکان و پەیوەندییە دەرەکییەکانە و عێراق دەخاتە دۆخێکی شەرمەزارییەوە لەبەردەم کۆمەڵگەی نێودەوڵەتیدا، ئەمەش وادەکات ڕێوشوێنەکان هەڕشە بۆ سەر بەرژەوەندییەکانی نەتەوە و گەلەکەمان دروست بکەن.
ئەوەشی خستوەتەڕوو، دوابەدوای ئەم هێرشە تاوانکارییە، فەرماندەی گشتیی هێزە چەکدارەکان بەڕێز محەممەد شیاع سودانی، جەخت لە جێبەجێکردنی فەرمانەکانی خۆی بۆ دەزگا ئەمنییەکان و لایەنە پەیوەندیدارەکان کردەوە، کە سازش نەکەن لە بەرپرسیارێتی خۆیاندا بۆ بەدواداچوون و دەستگیرکردنی تاوانباران و گەیاندنیان بە دادگا تاوەکو سزای دادپەروەرانەی خۆیان وەربگرن.
سەباح نوعمان وتەبێژی فەرماندەی گشتی هێزە چەکدارەکانی عێراق دووپاتی کردەوە، کە هیچ دوودڵی و پاشەکشەیەک لە ڕووبەڕووبوونەوەی هەر لایەنێکدا نابێت کە هەوڵی تێکدانی ئاسایشی پایتەخت و شارەکانی دیکەی عێراق بدات، یان چەک لە دەرەوەی چوارچێوەی یاساکانی دەوڵەت بۆ مەبەستی خۆی بەکاربهێنێت.