بەرەبەیانی ئەمڕۆ سێشەممە ٢٤ی ئاداری ٢٠٢٦، لە ئەنجامی هێرشێکی ئاسمانی چڕی سوپای ئەمریکا بۆ سەر بارەگای ئۆپەراسیۆنەکانی حەشدی شەعبی لە پارێزگای ئەنبار، سەعد بەعێجی فەرماندەی ئۆپەراسیۆنەکانی ئەو هێزە و ١٤ چەکداری دیکە کوژران و ژمارەیەکی زۆری دیکەش بریندار بوون.
دەستەی حەشدی شەعبی بە فەرمی ناوی کوژراوەکانی بڵاوکردەوە و رایگەیاند'' جگە لەو ١٥ کەسەی گیانیان لەدەستداوە، زیاتر لە ٢٠ چەکداری دیکەیان بریندارن و گواستراونەتەوە بۆ نەخۆشخانەکانی پارێزگای ئەنبار.''
لە کاتێکدا تیمەکانی فریاگوزاری هێشتا لە ژێر داروپەردووی بارەگا تێکدراوەکەدا بەدوای بێسەروشوێنەکاندا دەگەڕێن.
بڕیار وایە پێشنیوەڕۆی ئەمڕۆ کاژێر ١١:٠٠ لە مەراسیمێکی فەرمیدا لە شاری بەغدا تەرمی کوژراوەکان بە خاک بسپێردرێن، ئەمەش لە کاتێکدایە کە باری تەندروستی بەشێک لە بریندارەکان بە ناجێگیر وەسف دەکرێت و پێشبینی دەکرێت ژمارەی قوربانییەکان بەرزتر ببێتەوە.
ئەم پەرەسەندنە سەربازییە دوای ئەوە دێت کە لە کۆتایی مانگی شوباتەوە و بەهۆی هەڵگیرسانی جەنگی نێوان ئێران و ئەمریکا و ئیسرائیل، خاکی عێراق بووەتە گۆڕەپانی ململانێ و هێرشی بەردەوامی گرووپە چەکدارەکان و هێزەکانی ئەمریکا بۆ سەر پێگەکانی یەکتر.