پێشنیوەڕۆی ئەمڕۆ پێنجشەممە بارەگایەکی حەشدی شەعبی لە ناحیەی گەیارەی باشوری موسڵ لە پارێزگای نەینەوا بۆردومان کرا. بە پێی زانیارییەکان ئەو هێزە حەشدی سوننەن.

بەپێی راگەیەنراوێکی دەستەی حەشدی شەعبی، کاتژمێر ١١:٣٠ی پێشنیوەڕۆی ئەمڕۆ پێنجشەممە، پێگەیەکی فەوجی ٣٨ی سەر بە لیوای ٥٨ی فەرماندەیی ئۆپەراسیۆنەکانی نەینەوای حەشدی شەعبی کەوتووەتە بەر هێرشێکی ئاسمانی و زیانی گیانی نەبووە.

بە پێی زانیارییەکان بارەگاکە کە هێزی حەشدی هۆزەکانی سوننە، سەر بە حەشدی شەعبی تێیدا جێگیر کراون، دەکەوێتە نزیک گوندی سوڵتان عەبدوڵڵا لە ناحیەی گەیارە-ی باشوری موسڵ.

ئەمە لەکاتێکدایە پێشتریش لە دوو کاتی جیاوازدا بارەگایەکی لیوای ١٤ لە سنووری پارێزگای نەینەوا، بۆردومان کراوە.