باڵێۆزخانەی ئەمریکا لە بەغداد ئاگادارییەکەی بەپەلەی بۆ هاوڵاتیانی بڵاوکردوەتەوە و دەڵێت "مەترسییە ئەمنییەکان لە عێراق بەردەوامن، هۆشداری دەدەین کە سەرەڕای کردنەوەی کایەی ئاسمانی و دەستپێکردنەوەی گەشتە بازرگانییەکان، هێشتا مەترسییە ئەمنییەکان لە عێراقدا لە ئارادان".
سێ شەممە، ٥ ئایار ٢٠٢٦، لە راگەیاندراوەکەی باڵیۆزخانەی ئەمریکادا هاتووە "ئاسمانی عێراق هێشتا ڕووبەڕووی هەڕەشەی شاراوە دەبێتەوە بەهۆی ئەگەری هێرشی مووشەکی و فڕۆکەی بێفڕۆکەوان (درۆن)، وە ئەو گروپە چەکدارانەی کە هاوپەیمانی ئێرانن، بەردەوامن لە داڕشتنی پلان بۆ ئەنجامدانی هێرش دژی ئامانج و بەرژەوەندییەکانی ئەمریکا لە عێراق".
باڵیۆزخانەکە جەختی کردووەتەوە کە "کردنەوەی گەشتە ئاسمانییەکان بە واتای نەمانی مەترسی نایەت" و داوای لە هاوڵاتیانی خۆی کردووە کە بەوپەڕی وریاییەوە مامەڵە بکەن.