دەزگای دژە تیرۆری عێراق راگەیاندراوێکی بڵاوکردەوە و دەڵێت " لە دوو ئۆپەراسیۆنی جیاوازدا توانیمان دەست بەسەر دوو کۆگای چەک و تەقەمەنیدا بگرین".
یەک شەممە، ١٠ ئایار ٢٠٢٦، لە راگەیاندراوەکەی دژەتیرۆری عێراقدا هاتووە "مەفرەزە ئەمنییەکانی دەزگاکەمان، پشتئەستوور بە زانیاریی وردی هەواڵگری و بەدواداچوونی مەیدانی بەردەوام، لە دوو ئۆپەراسیۆنی جیاوازدا توانییان دەست بەسەر دوو کۆگای چەک و تەقەمەنیدا بگرن لە زنجیرە چیاکانی حەمرین لە سنووری نێوان پارێزگاکانی سەلاحەدین و کەرکوک".
"حەشارگەیەکی پاشماوەکانی داعشیان لە قەزای مەندەلی لە پارێزگای دیالە پشکنیوە و تێکیان داوە، کە چەندین مادەی تەقەمەنی و کەرەستەی سەربازی و کۆگایەکی تری تەقەمەنی تێدابووە"، دژەتیرۆری عێراق وا دەڵێت.
دەزگای دژە تیرۆر عێراق دڵنیایی دەداتە هاوڵاتیان کە "ئۆپەراسیۆنەکانیان بۆ راوەدوونانی پاشماوەکانی داعش و پاراستنی سەقامگیریی ناوچەکە بەردەوام دەبن".