بەپێی ئاماری نەتەوە یەكگرتووەكان لەمانگی رابردوودا لە ناوچە جیاجیاكانی عێراق هەزار‌و 119 هاوڵاتی كوژراون.

نێردەی نەتەوە یەكگرتوەكان لە عێراق لەراپۆرتی مانگانەی خۆی، ئاماری مانگی رابردووی بڵاوكردەوە كە هەر لەو مانگەدا هەزار‌و 561 كەسیش برینداربوون.

بە پێی راپۆرتەکەی یۆنامی، (575) کەس لەوانەی گیانیان لەدەستداوە کەسانی مەدەنی بوون (544) کەسیشیان ئەندامی هێزە ئەمنییەکانی عێراق بوون، (1196) کەس لە بریندارەکان مەدەنی بوون و (365) کەسیشیان ئەندامی هێزە ئەمنییەکان بوون.

ئەم ژمارەیە بەراورد بە مانگی شوبات بە شێوەیەکی مەترسیدار زیادی کردووە، کوژراوەکانی مانگی شوبات (670) کەس بوون و بریندارەکانیش (1290) کەس بوون.