ڕێوڕەسمی گواستنەوەی دەسەڵات لە عێراق بەڕێوەچوو، عادل عەبدولمەهدی سەرۆک وەزیرانی نوێی عێراق ڕایگەیاند، ئامانجیان دابینکردنی ژیانێکی شایستەیە بۆ هاوڵاتیان.
ئەمڕۆ پێنجشەممە ٢٥ی تشرینی یەکەمی ٢٠١٨، رێوڕەسمی گواستنەوەی دەسەڵات و دەستبەکاربوونی کابینەی نوێ لە عێراق بەڕێوەچوو و تیایدا حەیدەر عەبادى دەسەڵاتى ڕادەستى عادل عەبدولمەهدى کرد.
عەبدولمەهدی لە وتارێکدا وتی " چەندین کێشەمان لەبەردەمدایە وەکو پرسی خومەتگوزاریی و گەندەڵى کە دەبێت چارەسەریان بکەین."
باسی لەوەشکرد، ئامانجیان دابینکردنى ژیانێکى شایستەیە بۆ هاوڵاتییان و کەمێکى تر یەکەم کۆبوونەوەى ئەنجومەنى وەزیران ئەنجام دەدەن.
هاوکات حەیدەر عەبادی سەرۆکی وەزیرانی پێشووی عێراق لە رێورەسمەکەدا وتارێکی پێشکەشکرد و رایگەیاند، شانازى دەکەن بە گواستنەوەى دەسەڵات بەشێوەیەکى دیموکراسی.
وتیشی "پێویستە هاوکارى عادل عەبدولمەهدى بکەین بۆ ئەوەى سەرکەوتووبێت لە کارەکانى."