عەممار كوفی ئەو كوڕە كوردەیە، كە لە كوردستانەوە بەشداری لەپڕۆگرامی (عەرەب ئایدۆڵ) كردووە، لەكەناڵی mbc لە لوبنان، بەهۆی سەركەوتنی بۆ قۆناغەكانی زێڕین دەنگدانەوەیەكی زۆری لەنێو خەڵكی كوردستاندا هەبووە، بەجۆرێك شەوانی شەممە خەڵكێكی زۆر لەبەر عەممار بینەری ئەو بەرنامەیە دەبن.

عەممار كوفی، بەئەسڵ خەڵكی زاخۆییە و لەموسڵ گەورە بووە، بەو هۆیەوە عەرەبییەكی باش قسە دەكات، ئەوەش وایكردووە كەمتر وشەی كوردی لەنێو پرۆگرامەكە و دادوەرانی (عەرەب ئایدۆڵ) بەكاربێت، كە لەوەرزی رابردوودا بەهۆی نەزانینی زمانی عەرەبی لەلایەن پەرواز حوسێنەوە، دادوەرانی عەرەب ئایدۆڵ بەتایبەت، راغب عەلامە و نانسی عەجرەم، خۆیان فێری چەند وشەیەكی كوردی كردبوو.

پێشتر نەزانراو بوو كە عەممار كوفی لەلایەن هەڵكەوت زاهیر خۆی فێری گۆرانیگوتن كردووە و ئەوەش چوار ساڵی خایاندووە، هەرچەندە هەڵكەوت زاهیر زۆر سەرسام بووە بەعەممار، بەڵام پرسیارێكی گرنگ ئەوەیە چۆن تائێستا هەڵكەوت گۆرانی بۆ دروست نەكردووە و وەكو گۆرانیبێژێك نەیخستۆتە بازاڕەوە؟ لەكاتێك نزیك بووە لەحەز و خولیای هەڵكەوت زاهیر، لەوبارەیەوە هەڵكەوت زاهیر بۆ (سڤیل) دەڵێت "بێگومان عەممار توانایەكی زۆر باشی هەیە، هەم لەدەنگ هەمیش لەهەڵبژاردنی گۆرانیدا، چوار ساڵە قوتابی منە و من فێری گۆرانیگوتنم كردووە، خۆی حەزیكرد بچێتە ئەو بەرنامەیە و منیش پشتگیریم لێكرد و ئێستاش دەبینم توانایەكی زۆر باشی هەیە و بەهێزێكی زۆرەوە لەگەڵ ركابەرەكانی لەپێشبڕكێ دایە".

ئێستا ناونیشانی "كازم ساهیر"ـی عەرەب ئایدۆڵ بەخشراوە بەعەممار، بەڵام هەڵكەوت زاهیر دژی ئەو ناونیشانەیە و دەڵێ "من دژی ئەوەم پێی بگوترێ كازم ساهیری كوردی، چونكە هونەرمەند دەبێت ناسنامە و كارەكتەری خۆی هەبێ و نابێت لەكەس بچێت، من پێشتریش چەند جارێك ئامۆژگاری عەممارم كردووە، كە بەم ئەدایەی كازم ساهیر گۆرانی نەڵێت و دووربكەوێتە لەم ئەدایە و نەهێڵێت كازم ساهیر ئەوەندە كاریگەری لەسەری دروست بكات، بەجۆرێك نەتوانێت ناسنامەی خۆی دروست بكات".

موسیقار هەڵبەست سەڵاح پێشبینی دوارۆژێكی گەورە و باش بۆ عەممار دەكات و دەڵێت "من پێموایە عەممار دەتوانێت زۆر سەركەوتووبێت، ئەوەش سەرەتاكانی توانای ئەوە و پێشبینی كاری جوان و گەورەی بۆ دەكەم و هیوادارم بەئاستێكی زۆرباش بگەڕێتەوە كوردستان و دەست بەكاربكات و نەوەستێت، ئێمەش پشتگیری لێدەكەین".

بەپێی زانیارییەكانی (سڤیل) عەممار لەموسڵ خولیای گۆرانیگوتنی لا دروست بووە، بەتایبەت كاتێك نەیتوانی بەخۆشەویستەكەی بگات. كەسێكی نزیك لەعەممار بۆ (سڤیل) گوتی "ماوەیەك كچێكی عەرەبی خۆشدەویست لەموسڵ، بەڵام بەخۆشەویستەكەی نەگەیشت و تەنیا بووە یادگاری، بۆیە خولیای بۆ گۆرانیگوتن دروست بوو".

هەر بەپێی زانیارییەكانی (سڤیل) پێشتر هەڵكەوت زاهیر بەنیاز بووە ئەلبوومێكی قورئان بڵاوبكاتەوە، بەدەنگی عەممار كوفی، كە پێشتر چەند جارێك هەڵكەوت زاهیر ئەوەی بۆ راگەیاندنەكان ئاشكرا كردووە، كە ئاوازی بۆ قورئان داناوە، بەڵام دیارنییە ئایا ئێستا ئەلبوومەكە بەدەنگی عەممار یاخود میرە تۆمار كراوە، یانیش هەردووكیان.

ساڵی پار لەلایەن حكومەت و رێكخراوەكانەوە پاڵپشتییەكی زۆر لەپەرواز حوسێن كرا لەپرۆگرامی عەرەب ئایدۆڵ بەناردنی نامە و رۆیشتنی وەفدی كوردستان بۆ پرۆگرامەكە، هەروەك جێگری سەرۆكی حكومەت عیماد ئەحمەد و هاوسەرەكەیشی لەیەكێك لەبەرنامەكان ئامادە بوون. هەروەها لقی هەولێری سەندیكای هونەرمەندانی كوردستان، بەڵام ئەمساڵ هیچ لایەنێك پاڵپشتی خۆیان بۆ عەممار نیشان نەداوە، تەنانەت لەشەقامەكان و شوێنی رێكلام هیچ وێنەیەكی عەممار كوفی نابینرێت و كۆڕەك تیلیكۆم و ئاسیاسێڵ تائێستا بێدەنگن.

نیاز نوری، نەقیبی سەندیكای هونەرمەندانی كوردستان بۆ (سڤیل) رایگەیاند "لەئەساسدا ئەوە ئەركی سەندیكای هونەرمەندانی كوردستان نیە هاوكاری ئەو بەهرەمەندانە بكەین، كە بەشداری پڕۆگرامی عەرەب ئایدۆڵ دەكەن، كاری ئێمە بەرگریكردنە لەكارە هونەریی و پیشەییەكانی هونەرمەندان، هەروەها زەمینە خۆشكردن بۆیان. پێش عەرەب ئایدۆڵیش كورد لەپرۆگرامی دیكە لەوڵاتی ئەڵمانیا و سوید و نەرویج بەشداریان كردووە، لەگەڵ ئەوەشدا بەڵام پێمان خۆشە ناوی كورد و كودستان دێتە كایەوە". گوتیشی "بەڵام مەسەلەی پەرواز حوسێن حاڵەتێكی ئیستسنائی بوو، هەروەها بارودۆخی سیاسی ئەمساڵ لەگەڵ پار زۆر جیاوازە. پەروازیش خەڵكی هەولێرە بۆیە لقی هەولێری سەندیكای هونەرمەندان حەزیان كرد بچنە بەرنامەكە، ئێستاش ئەگەر لقی دهۆك حەزیان كرد بچن سەردانی بكەن و پاڵپشتی لێبكەن ئازادن".

نیاز نوری پێی وایە ئەگەر عەممار یەكەمی بەرناكەمەش بێت هیچ سوودێكی بۆ هونەری كورد نییە و نموونە بە دارین دێنێتەوە و دەڵێت "ئەوكات دەبێتە ئایدۆڵی عەرەبەكان خۆ نابێتە ئایدۆڵی كورد، بۆ نموونە دارین كە لەبەرنامەیەكی بەناوبانگی سوید دووەم بوو، نەبووە ئایدۆڵی كورد، ئێستا بۆتە ئایدۆڵێكی سویدیەكان و بەسویدی گۆرانی دەڵێت و نازانێت هونەری كوردی چییە". ئەو پێشنیاریشی بۆ عەممار هەیە و دەڵێت "وەكو بۆچوونی خۆم لام گرنك نییە عەمار ببێتە ئایدۆڵی عەرەب، لای من گرنگە ببێتە گۆرانیبێژ و دەنگێكی دیكەی ناو گۆرانی كوردی، توانای و ئەدای باشە و تۆنی دەنگی پاكە، لەوانەیە شارەزا بێت لەمەقامات و گۆرانی، بەڵام لەكۆتایدا ئەگەر ببێتە ئایدۆڵی عەرەبی، بۆ ئێمە هیچ زیادەیەك ناكاتە سەر هونەری كوردی".