هونەرمەندی لاو بێژەن جەزا پێش پێشكەشكردنی ئەڵقەی قۆناغی دووەمی پرۆگرامی ئەرەب ئایدڵ ئەنجامەكەی ئاشكرا دەكات.
بێژەن جەزا كە بەشداری وەرزی چوارەمی پرۆگرامی ئەرەب ئایدڵی كرد و توانی ئەندامانی لیژنەی پرۆگرامەكە سەرسام بكات و سەركەوتن بۆ قۆناغی دووەم مسۆگەر بكات، لە پەیامێكی ڤیدیۆیشدا ئەنجامی قۆناغی دووەم ئاشكرا دەكات كە ڕۆژی هەینی پێشكەش دەكرێت.
بێژەن ئاماژە بەوە دەكەت كە نەیتوانیوە لەو قۆناغەدا سەركەوتن بەدەست بهێنێت و پرۆگرامەكەی جێهێشتووە ، ئەمەش دوای ئەوەی لەگەڵ شەش بەشداربووی دیكەدا خراونەتە گروپێك و گۆرانییەكی تونسیان بۆ دانراوە، تا لەماوەی كەمتر لە 24 كاتژمێردا لەبەری بكەن و ئامادەی بكەن.
ئەو هونەرمەندە دەڵێت "جیاواز لە وەرزەكانی دیكەی پرۆگرامەكە قۆناغی دووەم برابووە دەرەوەی ستۆدیۆی و بۆ سەر شاخێك لە كاتژمێر 4:30 خولەكی بەیانی لە كەشێكی زۆر سارد و بە جلێكی كەمەوە گۆرانییەكەمان وتن بەڵام گروپەكەی ئێمە هیچ كەسێكمان سەرنەكەوتین".
بێژەن جەزا ساڵی 1990 لە سلێمانی لەدایكبووە و خوێندكاری بەشی دەنگی كۆلێژی هونەرە، چەند ساڵێكە دەستی بە كاری هونەری كردووە و خاوەنی چەند كلیپ و گۆرانییەكە.