ئاژانسەکانی تایبەت بە نرخی نەوت رایانگەیاند ئەمڕۆ دووشەممە ٩ی تەشرینی یەکەمی ٢٠٢٣ نرخی نەوت لە بازارەکانی جیهاندا بەشێوەیەکی بەرچاو بەرز بووە و بەرمیلێک نەوتی برێنت لە بازارەکاندا بە ٨٧ دۆلار و ١٢ سەنتە، لە کاتێکدا دوێنێ بە ٨٤ دۆلار و ٤٣ سەنت بوو.

نرخی بەرمیلێک نەوتی خاوی ئەمریکی بە ٨٥ دۆلار و٩٨ سەنت مامەڵەی پێوە دەکرێت لە کاتێکدا دوێنێ بەرمیلێک نەوتی خاوی ئەمریکی بە ٨٢ دۆلار و ٧٩سەنت بوو.

بەرزبوونەوەی نرخی نەوت بەشێکی زۆری پەیوەندی بە رووسیا و سعودیەوە هەیە کە تا کۆتایی ئەمساڵ ئارەزوومەندانە بڕی ٢ میلیۆن بەرمیل نەوت رۆژانە کەمتر دەخەنە بازارەوە، هاوکات هەڵگیرسانی شەڕی نێوان فەلەستین و ئیسرائیل و درووستبوونی بارگرژی لە ناوچەکەدا و مەترسی تێرکردنی بازاری نەوت بەهۆی ئەو شەڕەوە، نرخی نەوتی بەرز کردۆتەوە.