بۆ جاری دووەم خەمیس فەرحان عەلی خەنجەر لەلایەن وەزارەتی گەنجینەی ئەمریکاوە بە هۆی" بەشداربوون لە گەندەڵیکردن و قۆرغکردنی سامانی حکومەت بە مەبەستی بەدەستهێنانی قازانجی کەسی"، خرایە ناو لیستی بلۆککراوان و سزا درا.
وەزارەتی گەنجینەی ئەمریکا بەڵگەنامەیەکی بڵاوکردەوە کە تیایدا دەڵێت" جارێکی دیکە ناوی خەمیس فەرحان عەلی خەنجەر سەرۆکی هاوپەیمانی سیادەمان بۆ لیستی کەسایەتییە سزادرا و بلۆککراوەکانمان زیادکردووە".
وەزارەتی گەنجینەی ئەمریکا راشیگەیاند" هەر سەروەت و سامانێکی خەمیس خەنجەر لە وڵاتەکەمان بێت بلۆککراوە و ڕێگریش دەکەین لە هەر هاوڵاتییەکی ئەمریکی مامەڵەی لەگەڵدا بکەن".
لە بەڵگەنامەکەی وەزارەتی گەنجینەی ئەمریکا هاتووە" خەنجەر بەشدارە لە گەندەڵیکردن و قۆرغکردنی سامانی حکومەت بە مەبەستی بەدەستهێنانی قازانجی کەسی، پێدانی بەرتیل بە بەرپرسانی حکومی و کەسایەتییە سیاسییەکان لەسەر حسابی موڵک و ماڵی هاوڵاتییانی عێراق".
ئەمە بۆ دووەمین جارە کە گەنجینەی ئەمریکا ناوی خەمیس خەنجەر دەخاتە ناو لیستی سزادراوەکانیەوە کە جاری پێشوو لە ٧ـی ئازاری ساڵی ٢٠٢٣ بوو بە هەمان تۆمەتەکانی ئێستا.