سەرۆکی تورکیا بەردەوامە لە هێرشەکانی بۆ سەر نەتەنیاهۆ و ئیسرائیل و لەوەتەی جەنگی ئێران‌و ئیرائیلیش دەستیپێکردووە، هێرشەکانی توندترکردۆتەوە، لە نوێترین لێدوانیدا دەڵێت" حکومەتی نەتەنیاهۆ کۆمەڵکوژی دەکات".

رۆژی هەینی ٢٠ ی حوزەیران ئەردۆغان لە لێدوانێکی نوێدا رەخنەی توند لە نەتەنیاهۆ و حکومەتەکەی دەگرێت و دەڵێت" ئیسرائیل کە ئەمڕۆ گلەیی لە زیانگەیاندن بە یەکێک لە نەخۆشخانەکانی هەیە، بەپێی داتاکانی ڕێکخراوە نێودەوڵەتییەکان زیاتر لە ٧٠٠ هێرشی بۆ سەر دامەزراوە تەندروستییەکان لە غەززە ئەنجامداوە".

" زۆر شەرمەزارییە ئەوانەی غەزەیان کردووە بە گەورەترین ئۆردوگای کۆکردنەوە لە جیهاندا، باسی یاسا و مرۆڤایەتی دەکەن".( ئەردۆغان وای راگەیاند).

لە بەشێکی تری قسەکانیدا ئەردۆغان وتی" حکومەتی نەتەنیاهۆ بە پلەی یەکەم بەرپرسیارە لە کۆمەڵکوژییەکەی غەززە و ئەوانەی لە بەرامبەر ئەو کۆمەڵکوژییانەی نەتانیاهۆ و تۆڕە تاوانکارییەکەی لە ماوەی ٢١ مانگی ڕابردوودا بێدەنگن، هاوکات هاوبەشی تاوانەکەن".

سەرۆکی تورکیا پێوایە، جینۆساید لە غەززە و ململانێکانی بەردەوام لەگەڵ ئێران، " بەداخەوە بە خێرایی لە خاڵی نەگەڕانەوە نزیک دەبنەوە".

جەنگی ئیسرائیل و ئێران پێینایە هەفتەیەکەو هەندێک لە وڵاتانی ناوچەکە هەڵوێستیان بەرامبەر ئیسرائیل توندکردۆتەوەو لە پێشیشیانەوە تورکیا، چونکە نەتەنیاهۆ چەندجارێک لە لێدوانەکانیدا ئاماژەی بۆ گۆڕینی نەخشەی ناوچەکە دەکرد.