بەپێی هەواڵی ئاژانسی فارس_ی سەر بە سوپای پاسداران، لە ماوەی ١٢ ڕۆژ جەنگی نێوان ئێران و ئیسرائیل، ٧٠٠ هاوڵاتیی ئێرانی بە تۆمەتی هاوکاریکردنی ئیسرائیل دەستبەسەر کراون.
ئاژانسەکە بە ئاماژەکردن بەوەی "تۆڕی سیخوڕیی ئیسرائیل" لە ماوەی جەنگەکەدا " زۆر چالاک بووە" ڕایگەیاندووە" پارێزگاکانی کرماشان، لوڕستان، خووزستان، ئیسفەهان و فارس، زۆرترین ژمارەی دەستبەسەرکراویان لێ تۆمار کراوە و ئاماری دەستبەسەرکراوانی پارێزگای تارانیش هێشتا بڵاونەبووەتەوە".
دەزگا ئەمنییەکانی ئێران دەڵێن ئەو دەستبەسەرکراوانە، بە بەکارهێنان و کۆنترۆڵی درۆنی خۆتەقێن، دروستکردنی بۆمب، گرتنی ڤیدیۆ لە شوێنە سەربازییەکان و ناردنی زانیاری بۆ ئیسرائیل تۆمەتبار کراون.
ئاژانسی فارس ئاشکراشی کردووە، لە ماوەی ڕۆژانی جەنگدا زیاتر لە ١٠ هەزار درۆن لە سەرانسەری ئێران دۆزراونەتەوە و دەستیان بەسەردا گیراوە.
ئەمرۆ چوارشەممە ٢٥ی حوزەیرانی ٢٠٢٥ ئاژانسی هەواڵی تەسنیم بڵاوی کردوەوە" ئیدریس عالی، ئازاد شوجاعی و رەسوڵ ئەحمەد، بەتۆمەتی سیخوڕی بۆ قەوارەی زایۆنی دادگایی کران و بەرەبەیانی ئەمڕۆ لە باکووری رۆژئاوای شاری ورمێ سزای لەسێدارەدانیان بەسەردا جێبەجێکراوە".