وێنەی مزگەوتەکە.. فرانس پرێس
لە بارەی تەقینەوەکەی مزگەوتێکی عەلەوییەکان لە شاری حمس لە سوریا، ئەنجومەنی باڵای ئیسلامی عەلەوییەکان لە راگەیاندنێکی تونددا، " دەسەڵاتی ئەمری واقیع ی ئەلشەرع " بە بەرپرس ناوزەد دەکەن.
لە بەیاننامەکەدا کە ئێوارەی هەینی ٢٦ ی کانوونی یەکەم بڵاوکرایەوە هاتووە " ئەو بێدەنگییە شەرمەزارکەرە و دەستتێوەردانە گوماناوییەی بەرامبەر بەوەی زیاتر لە ساڵێکە بەسەر ڕۆڵەکانی مەزهەبی عەلەویدا دێت لەسەر دەستی "دەسەڵاتی ئەمری واقیع"، لە کوشتنی سیستماتیک، کۆچی زۆرەملێ، دەستگیرکردن، برسیكردنی بەئەنقەست و گوتاری تەکفیری و هاندەرانە، هەموو وڵاتی خستووەتە لێواری نادیار و تەقینەوەیەکی گشتگیر".
لە درێژەی راگەیاندنەکەدا عەلەوییەکان دەڵێن" بە ئامانجگرتنی تیرۆریستی و تاوانکارییانەی مزگەوتی ئیمام عەلی کوڕی ئەبو تالیب (سڵاوی خوای لێبێت) لە ناوچەی وادی ئەلدەهەب لە شاری حومس، درێژەپێدەری کارە تیرۆریستییە تەکفیرییە ڕێکخراوەکانە کە بە تایبەتی دژی پێکهاتەی عەلەوی و بە شێوەیەکی توندتر دژی پێکهاتەکانی دیکەی سووریا ئەنجام دەدرێت".
نیوەڕۆ رۆژی هەینی لە کاتی نوێژدا بۆمبێک لە مزگەوتی ئیمام عەلی لە شاری حمس تەقیەوەو لە ئەنجامدا ٥ کەس گیانیان لە دەستداو ١٨ کەسی دی بریندار بوون، رێکخراوی سەر بە قاعیدە، ئەنسار سونە، بەرپرسیارێتی خۆی لە هێرشەکە راگەیاند.
بەیاننامەیەک ئەنجومەنی باڵای ئیسلامی عەلەوی لە سووریا و تاراوگە
ئەو بێدەنگییە شەرمەزارکەرە و دەستتێوەردانە گوماناوییەی بەرامبەر بەوەی زیاتر لە ساڵێکە بەسەر ڕۆڵەکانی مەزهەبی عەلەویدا دێت لەسەر دەستی "دەسەڵاتی ئەمری واقیع"، لە کوشتنی سیستماتیک، کۆچی زۆرەملێ، دەستگیرکردن، برسیكردنی بەئەنقەست و گوتاری تەکفیری و هاندەرانە، هەموو وڵاتی خستووەتە لێواری نادیار و تەقینەوەیەکی گشتگیر.
بە ئامانجگرتنی تیرۆریستی و تاوانکارییانەی مزگەوتی ئیمام عەلی کوڕی ئەبو تالیب (سڵاوی خوای لێبێت) لە ناوچەی وادی ئەلدەهەب لە شاری حومس، درێژەپێدەری کارە تیرۆریستییە تەکفیرییە ڕێکخراوەکانە کە بە تایبەتی دژی پێکهاتەی عەلەوی و بە شێوەیەکی توندتر دژی پێکهاتەکانی دیکەی سووریا ئەنجام دەدرێت.
ئەم دەستدرێژییە لە سروشت و شێوازیدا لەگەڵ ڕووداوە تیرۆریستییەکانی پێشوو هاوشێوەیە، لەوانە ئەو تەقینەوەیەی کە سەربازە ئەمریکییەکانی لە تەنەف کردە ئامانج لەسەر دەستی خۆکوژێکی سەر بە دەسەڵاتی ئەمری واقیع (بە دانپێدانانی خۆیان) کە بووە هۆی کوژرانی سێ سەرباز، هەروەها تەقینەوەی کەنیسەی مار ئەلیاس لە گەڕەکی دوەیلەعە لە دیمەشق؛ ئەمەش یەکێتیی ڕێباز و بکەرەکە دەسەلمێنێت و هەموو ئیدیعایەک پووچەڵ دەکاتەوە کە گوایە ئەم تاوانانە ڕووداوی تاکەکەسی یان پێشێلکاریی دابڕاون.
بۆیە، ئێمە دەسەڵاتی ئەمری واقیع بە بەرپرسیاری تەواو و ڕاستەوخۆی ئەم تاوانانە دەزانین و دووپاتی دەکەینەوە کە ئەوەی ڕوودەدات ئەنجامێکی حەتمی سیاسەتە پەراوێزخەر، هاندەر و تەکفیرییەکانیانە، و ئەو ڕێبازەیانە کە لەسەر بنەمای توندوتیژی و خوێن دامەزراوە، بەتایبەتی بەرامبەر بە پێکهاتەی عەلەوی.
هەروەها بانگەوازێکی بەپەلە ئاراستەی کۆمەڵگەی نێودەوڵەتی، ئەنجومەنی ئاسایش، ڕێکخراوە نێودەوڵەتییەکان و بڕیار بەدەستانی جیهان دەکەین، و داوای هەنگاوی خێرا و یەکلاکەرەوە دەکەین بۆ ڕاگرتنی ڕێڕەوی خوێن و خستنی ناوچەکانی کەناراوەکانی سووریا (لازقیە، تەرتووس، حومس، دەوروبەری حەما) لەژێر پاراستنی نێودەوڵەتی، هەروەها جێبەجێکردنی بڕیاری ژمارە ٢٧٩٩ بۆ دەستەبەرکردنی سیستمێکی حوکمڕانی نیشتمانی و سیاسی گشتگیر کە پشت بە پرەنسیپی فیدراڵی و نامەرکەزیی سیاسی دەبەستێت، تاوەکو داخوازییەکانی هەموو سوورییەکان بەدی بهێنێت و ئاسایش و دڵنیایی بۆ هەمووان دابین بکات و کۆتایی بە سیاسەتەکانی خوێن و پەراوێزخستن لە سووریا بە گشتی و بۆ عەلەوییەکان بە تایبەتی بهێنێت.
ئاگادارییەکی ڕاشکاو دەدەین کە جێگەی لێکدانەوەی دیکە نییە: لە ئاست ئەم کارە تاوانکارییانە بۆ ماوەیەکی درێژ بێدەنگ نابین، و بەردەوامبوونیان بە وەڵامێک ڕووبەڕوو دەبێتەوە کە لەگەڵ قەبارەی ستەم و دەستدرێژییەکەدا بگونجێت؛ چونکە دانبەخۆداگرتن لەسەر ڕشتنی خوێن سنووری هەیە و کەرامەتی گەلان ناتوانرێت بۆ هەمیشە پێشێل بکرێت.
ئەنجومەنی باڵای ئیسلامی عەلەوی لە سووریا و تاراوگە