سەرۆکی ئەمەریکا، ئاشکرایدەکات، پەیوەندییەکی تەلەفۆنیی ئەرێنی و بەرهەمداری لەگەڵ سەرۆکی ڕوسیا ئەنجامداوە.
دۆناڵد ترەمپ، یەکشەممە ٢٨ی کانونی یەکەم، لە هەژماری تایبەتی خۆی لە پێگەی (ترووس سۆشیاڵ) ڕایگەیاند'' گفتوگۆکانی لەگەڵ پوتن زۆر باش بوون و زەمینەسازییەکی گونجاویان بۆ هەنگاوەکانی داهاتوو کردووە.''
ئەم گفتوگۆیە تەنیا چەند کاتژمێرێک پێش کۆبوونەوەیەکی چارەنوسساز دێت کە بڕیارە هەر ئەمڕۆ لە نێوان ترەمپ و ڤۆلۆدیمێر زێلێنیسکی، سەرۆکی ئۆکرانیا، لە ویلایەتی فلۆریدا بەڕێوە بچێت.
دۆناڵد ترەمپ لە کاتی بانگەشەی هەڵبژاردن بەردەوام بەڵێنی ئەوەی داوە کە جەنگی ڕوسیا و ئۆکرانیا لە کورتترین ماوەدا کۆتایی پێ بهێنێت بەڵام ئەمە ساڵ زیاترە کە نەیتوانیوە ئەو کارە ئەنجام بدات.