ئاژانسی هەواڵی تەسنیم سەر بە سوپای پاسداران ڕایگەیاند'' شەش ئەندامی هێزە ئەمنییەکان لە خۆپیشاندانەکانی پارێزگای فارس لە باشووری ئێران کوژراون.''
ئاماژەی بەوەشکردوە، زیاتر لە ١٢٠ ئەفسەر و ئەندامی هێزە ئەمنییەکانی ڕژیمی ئێران بریندار بوون.
بۆ چواردەیەمین شەوی یەک لەدوای یەک، خۆپێشاندان و ناڕەزایەتییەکان لانی کەم ٤٦ شار و شارۆچکەی ئێرانی گرتەوە، هاوکات بووە لەگەڵ مانگرتنی گشتی و داخستنی بازاڕەکان لە ٥٠ شار و شارۆچکەی ڕۆژهەڵاتی کوردستان لەسەر بانگەوازی حزب و ڕێکخراوە کوردییەکان.
بەپێی ئامارەکان، ژمارەی دەستگیرکراوان گەیشتووەتە زیاتر لە ٢ هەزار و ٢٧٧ کەس، کە ١٦٦یان مێردمنداڵی خوار ١٨ ساڵن. هەروەها ژمارەی کوژراوان گەیشتووەتە ٤٨ کەس (بە هێزە ئەمنییەکانیشەوە) پێکدادانی توند لە تاران و چەند شارێکی دیکە ڕوویداوە و چەندین ئۆتۆمبێلی هێزە ئەمنییەکان سووتێنراون.