ڕۆژنامەی ئیسرائیل هیۆم لە ڕاپۆرتێکی وردی دودی کۆگان، شرۆڤەکاری سەربازی، ئاشکرای دەکات، ئەمریکا دەستی کردووە بە کۆکردنەوەی هێزێکی سەربازی بێوێنە لە ڕۆژهەڵاتی ناوەڕاست.
ئەم جووڵە خێرایانە لە سێبەری هەڵکشانی گرژییەکاندا وەک ئاماژەیەکی ڕوون دەبینرێن بۆ نزیکبوونەوەی ئەگەری ڕووبەڕووبوونەوەیەکی سەربازی ڕاستەوخۆ لەگەڵ ئێران، بەتایبەت کە ڕاپۆرتەکە جەخت لەوە دەکاتەوە کە دۆخەکە بەرەو پێکدادانێکی بەرفراوان دەچێت.
ئەمریکا ستراتیژییەکی نوێی پەیڕەو کردووە و کەشتیی فڕۆکەهەڵگری جێرالد فۆرد دەریای کاریبی جێهێشتووە و بەرەو ناوچەکە بەڕێکەوتووە بۆ ئەوەی بێتە پاڵ کەشتیی فڕۆکەهەڵگری ئەبراهام لینکۆڵن کە لە دەریای عەرەبدا چالاکە.
هاوکات لەگەڵ ئەم دوو کەشتیگەلە زەبەلاحەدا، ژمارەیەکی زۆر لە کەشتییە تێکشکێنەرەکان و کەشتییە جەنگییە پێشکەوتووەکان لە نێوان دەریای ناوەڕاست و دەریای سوور و کەنداوی عەرەبیدا دابەشکراون بۆ ئەوەی گەمارۆیەکی سەربازی تەواو دروست بکەن.
سەبارەت بە هێزی ئاسمانی، ڕاپۆرتەکە ئاماژە بەوە دەکات کە لە ماوەی تەنها ٢٤ کاتژمێردا زیاتر لە ٥٠ فڕۆکەی جەنگی جۆراوجۆر ڕەوانەی ناوچەکە کراون، ئەم هێزە ئاسمانییە فڕۆکە پێشکەوتووەکانی وەک ئێف-٣٥ و ئێف-٢٢ و ئێف-١٦ لەخۆدەگرێت کە بە یاوەری فڕۆکەکانی سووتەمێنی تێکردن لە ئاسماندا گەیشتوونەتە بنکە جیاوازەکان، ئەمەش ئاستێکی بەرزی ئامادەباشی نیشان دەدات بۆ ئەنجامدانی هەر هێرشێکی ئەگەری یان پاراستنی ئاسمانی ناوچەکە لە کاتی جەنگدا.
لە کۆتا بەشی ئەم ئامادەکارییە سەربازییەدا، ئەمریکا بنکەکانی لە ناوچەکەدا بە سیستەمی بەرگری ئاسمانی زۆر پێشکەوتوو تەیار کردووە. جێگیرکردنی سیستەمەکانی پاتریۆت و تاد وەک قەڵغانێکی بەرگری کاردەکەن بۆ پووچەڵکردنەوەی هەر هێرشێکی موشەکی یان تۆڵەسەندنەوەیەک کە لەلایەن ئێرانەوە بکرێتە سەر بەرژەوەندییەکانی ئەمریکا یان هاوپەیمانەکانی، ئەمەش وا دەکات ناوچەکە لە لێواری تەقینەوەیەکی سەربازی گەورەدا بێت.