محەمەد ئیسحاق دار، وەزیری دەرەوەی پاکستان ئاشکرای کرد کە حکومەتی ئێران ڕەزامەندی نیشانداوە لەسەر تێپەڕبوونی بیست کەشتی بارهەڵگری وڵاتەکەی بەناو گەرووی هورمزدا و بڕیارە ڕۆژانە دوو کەشتی کە ئاڵای پاکستانیان لەسەر بێت بەناو ئەو ڕێڕەوە نێودەوڵەتییەدا تێپەڕن.
ئەم هەنگاوە دوای پەککەوتنی جوڵەی بازرگانی لە گەرووەکە دێت بەهۆی ئاڵۆزییە سەربازییەکانەوە و وەزیری دەرەوەی پاکستان ئەم ڕێککەوتنەی بە هەنگاوێکی گرنگ و ئەرێنی وەسف کرد بۆ گەڕاندنەوەی ئارامی و بەهێزکردنی متمانە لە ڕێگەی دیپلۆماسی و گفتوگۆوە بۆ دوورکەوتنەوە لە زیاتر ئاڵۆزبوونی دۆخەکە.
لە کاتێکدا کە پێشتر گەرووی هورمز بەهۆی هێرشەکانەوە بە تەواوی داخرابوو و نیگەرانییەکی جیهانی زۆری لێکەوتووەتەوە، ئێستا ئەم هەوڵانەی ئیسلام ئاباد وەک سەرەتایەک دەبینرێت بۆ کردنەوەی گرێکوێرەی بازرگانی دەریایی و کەمکردنەوەی ئەو فشارە ئابوورییانەی کە بەهۆی جەنگەکەوە دروست بوون.