بەپێی زانیارییە هەواڵگرییەکان، نزیکەی ٦٠٪ـی هێزی دەریایی سوپای پاسداران، بەتایبەت بەلەمە جەنگییە خێراکان، تێکنەشکاون و لە کاردان. ئەم هێزانە کە بۆ "جەنگی ناهاوسەنگ" داڕێژراون، هەر دوای ڕاگەیاندنی درێژکردنەوەی ئاگربەست لەلایەن ترەمپەوە، هێرشیان کردووەتە سەر چەند کەشتییەکی بازرگانی لە تەنگەی هورمز، ئەمەش دەریدەخات تاران هێشتا توانای پەکخستنی هاتوچۆی نەوتی هەیە.

ئەم ڕاپۆرتە هەواڵگرییانە تەواو پێچەوانەی لێدوانەکانی دۆناڵد ترەمپ و پێت هێگسێتی وەزیری جەنگین. لە کاتێکدا ترەمپ ڕایگەیاندبوو کە هێزی دەریایی و ئاسمانی و سەرکردەکانی ئێرانیان "لەناوبردووە" و هێگسێتیش ئۆپەراسیۆنەکەی بە "سەرکەوتنێکی مێژوویی" ناوزەد کردبوو، جەنەڕاڵ جەیمس ئادەمز، بەڕێوەبەری ئاژانسی هەواڵگریی بەرگری هۆشداری دەدات کە ئێران هێشتا خاوەنی هەزاران موشەک و درۆنی بۆمبڕێژکراوی مەترسیدارە.

لە بەرامبەر ئەم گومانانەدا، شۆن پارنێڵ، وتەبێژی پێنتاگۆن، بەرگری لە ئەنجامی هێرشەکان کرد و ڕایگەیاند'' لە ماوەی ٤٠ ڕۆژدا گورزی کەمەرشکێنیان لە ئێران داوە.'' پارنێڵ جەختی کردەوە کە ٩٢٪ـی کەشتییە گەورەکانی ئێرانیان تێکشکاندووە و ئەم ئۆپەراسیۆنەشی بە گەورەترین لەناوبردنی هێزێکی دەریایی لە مێژووی دوای جەنگی جیهانی دووەم وەسف کرد.