رێبەری باڵای ئیسلامی ئێران، موجتەبا خامنەیی، لە تۆری کۆمەڵایەتی ئێکس پەیامێکی بڵاوکردوەتەوە و وەڵامی دۆناڵد ترەمپ دەداتەوە و پەیامێکی ئاراستەی هاوڵاتیانی ئێران کردوە و دەڵێت "لە ئەنجامی ئەم یەکڕیزییە سەرسوڕهێنەرەی لە نێوان هاونیشتمانیاندا دروست بووە، دوژمنی تووشی شکست کردووە".
موجتەبا خامنەیی، پێنج شەممە، ٢٣ نیسان ٢٠٢٦، نووسیویەتی "دوژمن بە مەبەستی تێکدانی یەکڕیزی و ئاسایشی نیشتمانی، هەڵمەتێکی میدیایی بۆ بە ئامانجگرتنی بیر و دەرونی هاوڵاتیان دەستپێکردووە، ئاگاداربن و دەرفەت مەدەن ئەم مەرامە خراپە بەهۆی کەمتەرخەمی ئێمەوە بەدی بێت".
دۆناڵد ترەمپ پێشتر بڵاویکردەوە کە "سێ دەستەیان لە سەرکردەکانی ئێران لەناو بردووە، بۆیە نازانرێت، ئێستا کێ لەو وڵاتە سەرکردەیانە" و لە ناوخۆدا لە کێشە و پشێوییەکی گەورەدایە و کەس هاوکاریی ناکات، بۆیە چیدیکە ئێران ناتوانێت ببێتە شەڕفرۆش و گێچەڵکار لە رۆژهەڵاتی ناوەڕاست.
هەر لە پێنج شەممەدا مەسعود پزیشکیان، سەرۆک کۆمار، محەمەدباقر قالیباف سەرۆکی پەرلەمانی ئێران و چەند بەرپرسێکی تری سیاسی و سەربازی کۆماری ئیسلامی ئێران وەڵامی ترەمپیان دایەوە.