مەزاهیر حسێنی، بەرپرسی پرۆتۆکۆلی نووسینگەی ڕابەری باڵای ئێران لە میانی بەشداریکردنی لە گردبوونەوەیەکی لایەنگرانی کۆماری ئیسلامیدا ڕایگەیاند'' موجتەبا خامنەیی لە یەکەم ڕۆژی هێرشەکانی ئەمریکا و ئیسرائیل بۆ سەر کۆمەڵگەی ڕێبەرایەتی بریندار بووە.''
حسێنی ئاماژەی بەوە کرد کە بەهۆی بۆردومانەکەوە موجتەبا خامنەیی کەوتووەتە سەر زەوی و پشتی و ئەژنۆ و پشتی گوێچکەی کەمێک بریندار بوون بەڵام ئێستا تەندروستی تەواو باشە و برینەکانی بەرەو ساڕێژبوون دەچن.
بەرپرسەکەی نووسینگەی ڕابەر بە توندی ئەو دەنگۆیانەی ڕەتکردەوە کە باس لە هەبوونی برین لە دەموچاوی موجتەبا خامنەییدا دەکەن و جەختی کردەوە کە تەنیا برینێکی بچووک لە پشتی گوێچکەیدا هەیە کە بەهۆی بەستنی مێزەرەکەیەوە دیار نییە.
هەروەها ئاماژەی بەوە دا کە هەفتەی ڕابردوو چاوی بە کەسانی نزیک کەوتووە و هیچ شوێنەوارێکی برینداری لە دەموچاویدا نییە و ئەو قسانەی دوژمنان بڵاوی دەکەنەوە دوورن لە ڕاستییەوە و تەنها مەبەست لێی بەدەستهێنانی وێنە و ڤیدیۆیە تاوەکو لە دژی بجوڵێنەوە.
مەزاهیر حسێنی دڵنیایی دایە لایەنگرانی ڕژێمەکە و داوای لێکردن ئارام بگرن چونکە موجتەبا خامنەیی لە کاتێکی گونجاودا دەردەکەوێت و بە شێوەیەکی ڕاستەوخۆ قسە بۆ گەل دەکات.
ئەم ڕوونکردنەوەیە لە کاتێکدایە کە دوای هێرشە ئاسمانییەکان گومانێکی زۆر لەسەر بارودۆخی تەندروستی بەرپرسانی باڵای ئێران هەبوو و تاران دەیەوێت لە ڕێگەی ئەم لێدوانانەوە کۆنترۆڵی جەنگی دەروونی بکات و سەقامگیریی ناوخۆیی و پەیامی بەهێزیی سەرکردایەتی وڵاتەکەی بپارێزێت.