کۆنسەی بەڕێوەبەریی کۆنگرەی نەتەوەیی کوردستان (كه‌نه‌كه‌) له‌باره‌ی وته‌كانی تره‌مپ، رایگه‌یاند، ئه‌و وتانه‌ی سه‌رۆكی ئه‌مریكا "بۆنی پیلانێکی دژە کوردی لێدێت و کورد سەرباز و نۆکەری هیچ وڵاتێک نیە".

کۆنسەی بەڕێوەبەریی کۆنگرەی نەتەوەیی کوردستان له‌ راگه‌یه‌نراوێكدا سەبارەت بە وتەکانی دۆناڵد تره‌مپ، سه‌رۆكی ئه‌مریكا لەسەر کورد، رایگه‌یاند، "ماوەیەکە بەڕێز دۆناڵد ترەمپ دەڵێت: (چەکماندا بە کورد بۆ ئەوەی بگاتە دەستی نەیارانی ڕێژیمی ئێران، بەڵام کورد ئەو چەکانەی پێنەداون و بۆ خۆیان هێشتویانەتەوە) ترەمپ چەندین جار و بە شیوازی جیاوا ئەو لێدوانەی دوبارە کردوه‌تەوە و بە توندی لەسەر کورد دەئاخڤێت، ئەم هەڵوێست و رەفتارە بۆنی پیلانێکی دژە کوردی لێ دێت. بێگومان ئاشکرایە هەندێک هێزی نەیاری کورد پلانی دژە کورد بەڕێوەدەبەن".

هەروەها هاتووە، "دەمێکە کورد و ئەمریکا پەیوەندیان هەیە. ڕۆژانی خۆش و ناخۆشمان پێکەوە بەسەر بردوە، ئەم هەڵوێستە ناڕەوایەی سەرۆکی ئەمریکا هەمو کورد دەخاتە گومانەوە و زیان بە پەیوەندییەکانی نێوان کورد و ئەمریکا دەگەیەنێت".

ئاماژە بەوەشکراوە، "ئێمە وەک کۆنگرەی نەتەوەیی کوردستان ئەم هەڵوێست و گوتارانە قبوڵ ناکەین و بە مەترسیداری دەیبینین. ئەم چیرۆکی چەک بە کورد دانە چەندە ڕاستە یان نا، دەبێت ڕون بکرێتەوە. ئێمە دەزانین ئەو حیزب و ڕێکخراوانەی کە ئەندامی کۆنگرەی نەتەوەیی کوردستانن لەم جۆرە مامەڵانەدا بەشدار نەبون و نین و ئێمەش وەک کۆنگرە هیچ زانیارییەکمان لەسەر ئەم کارە نییە".

دۆناڵد ترەمپ، دوێنێ دوشه‌ممه‌ له‌میانی كۆنگره‌یه‌كی رۆژنامه‌وانیدا جارێكی دیكه‌ له‌باره‌ی پێدانی چه‌ك به‌ كورد قسه‌ی كرد كه‌ بیگه‌یه‌ننه‌ خۆپیشانده‌رانی ئێران و وتی، ئەوان ناوبانگێکی زۆرباشیان لە کۆنگرێس هەیە و لەوێ دەڵێن ئەوان زۆر بە تووندی شەڕ دەکەن، "بەڵام نەخێر؛ تەنیا کاتێک پارەیان دەدرێتێ بە باشی شەڕ دەکەن. بۆیە من زۆر لە کورد بێهیوام."