سەرۆکی ویلایەتە یەکگرتووەکان باس لە سەپاندنی مۆدێلی ڤەنزوێلا بەسەر ئێران دەکات و بە دووری نازانێت دەستبەسەر دوورگەی خارگدا بگرێت و کۆنترۆڵی نەوتی ئێران بکات.

لە چاوپێکەوتنێکیدا لەگەڵ تۆڕی "فۆکس نیوز”، دۆناڵد ترەمپ، سەرۆکی ئەمریکا، ئاماژەی بە دەستبەسەرداگرتنی دوورگەی خارگ و نەوتی ئێران دا و باسی لە نەوتی ڤەنزوێلاش کرد، وتی؛ وڵاتەکەی توانیویەتی "سامانێکی زەبەلاح” لە نەوتی ڤەنزوێلا کۆبکاتەوە و ئاماژەی بەوەش کرد، واشنتۆن بە نیازە لە ماوەیەکی نزیکدا هەمان مۆدێل و سیناریۆ بەسەر نەوتی ئێرانیشدا بسەپێنێت.

بەوتەی ترەمپ نەوتی ڤەنزوێلا ڕەوانەی بازاڕەکانی ناو ئەمریکا کراوە و جەختیشیکردەوە، وڵاتەکەی قازانج و داهاتێکی یەکجار زۆر لەم پرۆسەیە بەدەستدەهێنێت.

سەرۆکی ئەمریکا ڕوونی کردەوە، کۆمپانیا نەوتییەکانی ئەمریکا سامانێکی گەورە لە ڤەنزوێلا بەدەستدەهێنن و ئاماژەی بەوەشداوە، کە واشنتۆن خۆی ئەو کۆمپانیایانە دیاری دەکات کە ڕێگەیان پێدەدرێت لە کەرتی نەوتی ڤەنزوێلادا وەبەرهێنان بکەن، و ئەم کۆمپانیایانەش بە شێوەیەکی ڕاستەوخۆ لەگەڵ حکومەتی ئەمریکا مامەڵە دەکەن نەک لەگەڵ حکومەتی ڤەنزوێلا.

لە درێژەی قسەکانیدا ترەمپ پەردەی لەسەر پلانەکانی لادا بۆ دەستبەسەرداگرتنی نەوتی ئێران بە هەمان سیناریۆی ڤەنزوێلا و ئەگەری کۆنترۆڵکردنی دوورگەی "خارگ”ـی لەلایەن هێزەکانی ئەمریکاوە بە دوور نەزانی.

دوورگەی خارگ ناوەندی سەرەکیی هەناردەکردنی نەوتی ئێرانە و نزیکەی ٩٠٪ـی هەناردەی نەوتی ئەو وڵاتەی لە ڕێگەیەوە ڕەوانەی جیهان دەکرێت، ئەمەش وایکردووە ببێتە ئامانجێکی ستراتیژی گرنگ بۆ واشنتۆن و هەرچی ڤەنزوێلاشە خاوەنی گەورەترین یەدەگی نەوتە لە جیهاندا کە بە ٣٠٣ ملیار بەرمیل دەخەمڵێندرێت (نزیکەی ١٧٪ـی یەدەگی جیهانی)، بەمەش لە پێش سعودیەوە دێت.