تۆڕی هەواڵی CBS ڕۆژی شەممە ڕایگەیاند کە دۆناڵد ترەمپ، سەرۆکی ئەمریکا لەگەڵ پنتاگۆن و ئاژانسەکانی هەواڵگری لە ئامادەکاریدان بۆ دەستپێکردنەوەی هێرشە سەربازییەکان بۆ سەر ئێران لە ماوەی ٧٢ کاتژمێری داهاتوودا.

ئەم تۆڕی هەواڵە لە زاری چەندین سەرچاوەی ئاگادارەوە رایگەیاند: "تا ئێوارەی هەینی، هیچ بڕیارێکی کۆتایی سەبارەت بە ئەگەری هێرشی نوێ نەدراوە".

سەرچاوەکان ڕایانگەیاندووە کە هەندێک لە سەرکردە سەربازی و هەواڵگرییەکان، بەهۆی ئەگەری هێرشەکانەوە، پلانەکانی خۆیان بۆ پشووی کۆتایی هەفتەی "ڕۆژی یادکردنەوە" (Memorial Day) هەڵوەشاندووەتەوە.

بەرپرسانی بەرگری و هەواڵگری دەستیان کردووە بە نوێکردنەوەی لیستی ئامادەباشی و بانگهێشتکردن بۆ دامەزراوەکانی ئەمریکا لە دەرەوەی وڵات، هەروەها جوڵەی هێزە جێگیرکراوەکان لە ڕۆژهەڵاتی ناوەڕاست بە شێوەی خولی لە دەرەوەی ناوچەکە کار دەکەن؛ ئەمەش وەک بەشێک لە هەوڵەکان بۆ سنووردارکردنی ئامادەیی سەربازی ئەمریکا لە ناوچەکەدا و لەبەر بوونی نیگەرانیی لە ئەگەری تۆڵەسەندنەوەی ئێران.

ئەمەش لە کاتێکدایە کە ئەمڕۆ شەممە ڕێکخراوی فڕۆکەوانیی سڤیلی ئێران ئاسمانی ڕۆژئاوای وڵاتەکەی بە شێوەیەکی کاتی داخست.