سعودیە سەرکەوتنی پرۆسەی پێشوازیکردنی لە زیاتر لە ملیۆنێک و ٧٠٠ هەزار حاجی راگەیاند، کە نزیکەی ملیۆنێک و نیویان لە وڵاتە جیاوازەکانەوە هاتوون.

سێشەممە، ٢٦ی ئایار، دەستەی گشتیی ئاماری سعودیە لە راگەیەنراوێکدا ئاشکرای کرد، کۆی گشتیی ژمارەی حاجییان بۆ ئەمساڵ گەیشتووەتە ملیۆنێک و ٧٠٧ هەزار و ٣٠١ کەس، لەو ژمارەیەش ملیۆنێک و ٥٤٦ هەزار و ٦٥٥یان لە رێگەی دەروازە جیاوازەکانەوە هاتوونەتە وڵاتەکە، لە کاتێکدا ژمارەی حاجییانی ناوخۆ ١٦٠ هەزار و ٦٤٦ کەس بووە.

دەستەکە ئاماژەی بەوە کردووە، کە "کۆی گشتیی ژمارەی حاجیانی نێر گەیشتووەتە ٨٩٣ هەزار و ٣٩٦ کەس، لە بەرامبەریشدا ژمارەی حاجییانی مێ گەیشتووەتە ٨١٣ هەزار و ٩٠٥ کەس."

دەستەی گشتیی ئاماری سعودیە روونی کردەوە، کە "ژمارەی ئەو حاجیانەی لە رێگەی فڕۆکەوە هاتوون گەیشتووەتە ملیۆنێک و ٤٨٥ هەزار و ٧٢٩ کەس، لە کاتێکدا ٥٤ هەزار و ٤٢٩شیان لە رێگەی دەروازە وشکانییەکانەوە هاتوون، هەروەها ئەوانەی لە رێگەی کەشتییەوە گەیشتوون ژمارەیان شەش هەزار و ٤٩٧ کەسە.