رۆژنامەیەکی ئەمریکی ئاشکرای دەکات، بۆ یەکەم جارە لە مێژووی سەرۆکەکانی ئەمریکا، دۆناڵد ترەمپ لە دوایین پشکنینی پزیشکیدا لەلایەن ٢٢ پزیشکی پسپۆڕەوە هەڵسەنگاندنی بۆ کراوە.

رۆژنامەی "واشنتۆن پۆست" بڵاویکردەوە، دۆناڵد ترەمپ، سەرۆکی ئەمریکا لە دوایین پشکنینی پزیشکیدا لەلایەن ٢٢ پسپۆڕی بواری پزیشکییەوە هەڵسەنگاندنی بۆ کراوە. رۆژنامەکە ئەم ژمارەیەی بە "بێپێشینە" وەسف کردووە لە چاو ئەو پشکنینانەی بۆ سەرۆکەکانی پێشووی ئەمریکا کراون.

رۆژنامەکە ئاماژەی بەوە کردووە، راپۆرتی پزیشکیی کۆشکی سپی کە دوای پشکنینەکە بڵاوکراوەتەوە، دەری دەخات ٢٢ پزیشک و پسپۆڕ بەشدارییان لە هەڵسەنگاندنی دۆخی تەندروستی ترەمپی تەمەن ٧٩ ساڵ کردووە. ئەمە لە کاتێکدایە ژمارەی ئەو پسپۆرانەی پشکنینیان بۆ سەرۆکانی پێشوو کردووە زۆر کەمتر بووە؛ بۆ نموونە، لە یەکەم پشکنینی جۆرج بوشی باوک لە ساڵی ١٩٨٩ تەنیا پێنج پزیشک بەشداربوون، هەروەها لە یەکەم پشکنینی جۆرج بوشی کوڕدا ١٢ پزیشک بەشداربوون.

بەگوێرەی راپۆرتەکە، کۆشکی سپی جۆری پسپۆڕییەکان یان هۆکاری بەشداریپێکردنی ئەو ژمارە زۆرەی پزیشکانی روون نەکردووەتەوە، ئەمەش بووەتە جێی پرسیار لە ناوەندە میدیایی و سیاسییەکاندا کە ئایا ئەمە پەیوەندی بە تەمەنی ترەمپەوە هەیە یان تەنیا رێکارێکی خولیی ئاساییە.

ئاشکراکردنی ژمارەی ئەو پزیشکانە لە کاتێکدایە کە چاودێرییەکان بۆ سەر دۆخی تەندروستی سەرۆکی ئەمریکا توندتر بوونەتەوە، بەتایبەت کە بەرەو تەمەنی ٨٠ ساڵی هەنگاو دەنێت. ئەمەش هاوکاتە لەگەڵ داواکارییە بەردەوامەکان بۆ هەبوونی شەفافیەتی زیاتر سەبارەت بە تەندروستی بەرپرسە باڵاکانی ئەمریکا.