فەرماندەیی ناوەندیی هێزەکانی ئەمریکا (سێنتکۆم)، لە راگەیاندراوێکدا شەپۆلی دووەمی هێرشکردنە سەر ئێرانی راگەیاند.
چوار شەممە، ١٥ تەمووز ٢٠٢٦، لە راگەیاندراوەکەی سێنتکۆم هاتووە "کاتژمێر٣:٠٠ ی پاشنیوەڕۆ بەکاتی واشنتن، هێزەکانی ویلایەتە یەکگرتووەکانی ئەمریکا دەستیان بە ئەنجامدانی دووەم شەپۆلی هێرشەکان کرد بۆ سەر بنکە و توانستە سەربازییەکانی ئێران کرد".
سێنتکۆم ئاماژەی بەوەشکردوە "هێرشەکان ئەو توانستە سەربازییانەی ئێرانیان کردووەتە ئامانج کە بۆ هەڕەشەکردن لەو کەشتییانە بەکاردێن کە بە گەرووی هورمزدا تێدەپەڕن؛ کە ڕێڕەوێکی ئاویی نێودەوڵەتیی ستراتیژی و هەستیارە بۆ بازرگانیی جیهانی".
سێنتکۆم وتوشیەتی "ئەم ئۆپەراسیۆنە لەسەر فەرمانی راستەوخۆی فەرماندەی گشتیی هێزە چەکدارەکان (سەرۆکی ئەمریکا) ئەنجام دەدرێت، بە مەبەستی لێپرسینەوە لە ئێران و رێگریکردن لەو هەڕەشانەی کە دەبنە مەترسی بۆ سەر ئازادیی هاتوچۆی کەشتیگەلە بازرگانییەکان لە ناوچەکەدا".