زیاتر لە حەوت ڕۆژە، ڕەجەب تەیب ئەردۆغان، سەرۆک کۆماری تورکیا لە دەرکەوتنی گشتی دابڕاوە، لە کاتێکدا چاوەڕوان دەکرا بەشداری لە چەندین بۆنەی فەرمیدا بکات، کە دیارترینیان ئاهەنگەکانی ٢٠ی تەموز بوو لە باکووری قوبرس، بەڵام جەودەت یڵماز، جێگری سەرۆک کۆمار لە جیاتی ئەو نوێنەرایەتی تورکیای کرد، بێ ئەوەی هیچ ڕوونکردنەوەیەکی فەرمی دەربارەی هۆکاری ئەم غیابە بڵاوبکرێتەوە.

بە پێی سەرچاوە رۆژنامەنوسییەکان، ئەم دوورکەوتنەوەیە دەرگای پرسیاری زۆری لە ناوخۆی تورکیادا کردووەتەوە، بە تایبەت لە میدیاکانی ئۆپۆزسیۆن و تۆڕە کۆمەڵایەتییەکان، کە تێیاندا چەندین لێکدانەوە خراونەتە ڕوو، بەڵام هەموویان تەنها لە چوارچێوەی پێشبینیدا ماونەتەوە.

گرنگترین ئەو ئەگەرانەی باس دەکرێن بریتین لە سێ خاڵ:

١- ئەردۆغان تووشی نەخۆشی بووە یان پشکنینی پزیشکی ئەنجام دەدات.

٢- دەرکەوتنی گشتی کەمکردووەتەوە بەهۆی هۆکاری ئەمنی یان پەیوەندی بە خشتەی کارەکانیەوە هەیە.

٣- غیابێکی کاتییە و پێش دەرکەوتنی دێت لە بۆنەیەکی سیاسی یان دیپلۆماسی گرنگدا.

تا ئێستا هیچ بەیاننامەیەکی فەرمی نییە کە نەخۆشکەوتن، کۆچی دوایی، یان دەستلەکارکێشانەوەی ئەردۆغان پشتڕاست بکاتەوە، هەروەها سەرۆکایەتی تورکیاش هیچ ڕوونکردنەوەیەکی بۆ ئەم بێدەنگییە نەداوە.

بۆیە پرسیارەکە بە هەڵواسراوی دەمێنێتەوە: ئەردۆغان لە کوێیە؟ و بۆچی سەرۆکایەتی تورکیا تا ئێستا بێدەنگە؟