سێرگی لاڤرۆڤ وەزیری دەرەوەی روسیا و مەولود چاوشئۆغڵو وەزیری دەرەوەی توركیا دەربارەی رەوشی سوریا و بەرەنگاربوونەوەی تیرۆر كۆببنەوە.
وەزارەتی دەرەوەی روسیا رایگەیاند كۆبوونەوەكە رۆژی هەین لە مۆسكۆ بەڕێوەدەچێت.
كەناڵی تی ئاڕ تی توركیش بڵاویكردەوە كە لاڤرۆڤ و چاوشئۆغڵو لە كۆبوونەوەكەیاندا سەرنج دەخەنە سەر رەوشی سوریا و بەتایبەتیش شاری ئیدلب، كە سوریا دەیوێت لەرێی ئۆپراسیۆنی سەربازییەوە لە گروپە تیرۆریستییەكان پاكی بكاتەوە.
كەناڵەكە ئاشكراشیكرد كە هەفتەی رابردوو خولوسی ئاكار وەزیری بەرگری و هاكان فیدان سەرۆكی دەزگای هەواڵگری توركیا سەردانی مۆسكۆیان كردووەو لەوێ لەگەڵ هاوتا روسییەكانیان كۆبوونەتەوە.
بەپێی رێككەوتنی كەمكردنەوەی گرژییەكانی نێوان مۆسكۆ-ئەنقەرە- تاران، كۆنترۆڵكردنی رەوشی پارێزگای ئیدلب و سەقامگیركردنی دەكەوێتە ئەستۆی حكومەتی توركیاوە.
ئێستا ئیدلب تەنیا ناوچەیە كە لەژێر دەستی گروپە تیرۆریستییەكاندا مابێتەوە، ئەویش دوای ئەوەی سوپای سوریا توانی لە غۆتەی دیمەشق و ناوچەكانی باشووری وڵاتەكە شكستیان پێبهێنێت.