دەرمانخانەی نوێ كە ناوی گۆڤارێكی ئەڵمانییە، لە زاری چەند پسپۆڕێكەوە ئاماژە بەوە دەكات كە سەرمای زستان كاریگەری لەسەر تەندروستی ئەو كەسە بەتەمەنانە هەیە كە بەدەست نەخۆشیەكانی ڕەبۆ و گیرانی بۆرییەكانی هەناسەدانەوە دەناڵێنن.

پسپۆڕەكان ئاماژە بەوە دەكەن كە هەوای سارد دەبێتە هۆی ڕەقبونی بۆرییەكانی هەناسەدان و تەسكبونەوەی زیاتری ئەو بۆریانە، ئەمەش دەبێتە هۆی دروستبونی كۆكە و هەناسە توندی.

گۆڤارە ئەڵمانییەكە داوا لە كەسانی توشبوو بە ڕەبۆ دەكات كە بەردەوام سپرای نەخۆشی ڕەبۆ لەگەڵ خۆیاندا هەڵبگران، بە تایبەت لە كاتی سەرما و دابەزینی پلەی گەرمادا، هەروەها بڕێكی زۆر لە شلەمەنییەكان بخۆنەوە و گرنگیش بدەن بە ئەنجامدانی ڕاهێنانە وەرزشییەكان، بەو مەرجەی ڕاهێنانەكان لە شوێنی داخراودا ئەنجام بدرێن و ئەو كەسانە بەركەوتنیان لەگەڵ هەوای سارددا نەبێت.