پاش بوونی بە راهێنەری ریاڵ مەدرید لە شوێنی ئەلۆنسۆ،ئەربیلوا بەشداری کۆنگرەیەکی رۆژنامەوانی کردوو باسی لە دۆخی تیپەکە کرد
ئەلفارۆ ئەربێلوا: ئەمڕۆ ڕۆژێکی تایبەتە، وەک هەموو ئەو ڕۆژانەی کە بەشێک بووم لە ڕیاڵ مەدرید. بێگومان ئەمڕۆ جیاوازە، من ئاگاداری ئەو بەرپرسیارێتی و ئەرکە گەورەیەم کە لەبەردەممە، زۆر بەپەرۆشم.
ئایا قسەت لەگەڵ چابی ئەلۆنسۆ کردووە؟
ئەربێلوا: ئەوەی لەگەڵ چابی باسم کردووە بە نهێنی لە نێوانماندا دەمێنێتەوە. ئارەزوویەکی زۆرم هەیە یەکەم یاری ئەنجام بدەم، هەست بە جۆش و خرۆشێکی زۆر دەکەم و بە تامەزرۆییەوە چاوەڕێی سبەینێم.
چۆن هەواڵی دوورخستنەوەی چابی ئەلۆنسۆت بیست؟
ئەربێلوا: دوێنێ دوای نیوەڕۆ ئاگادار کرامەوە کە چابی و یانەکە لەیەکتر جیادەبنەوە و من بەرپرسیارێتی تیمی یەکەم دەگرمە ئەستۆ.
دوێنێ قسەم لەگەڵ چابی کرد، هەمووتان دەزانن چ هاوڕێیەتییەک لە نێوانماندا هەیە و چەندە ڕێزی دەگرم و خۆشم دەوێت.
پەیوەندییەکەمان دوولایەنەیە و هەمیشە بەو شێوەیە دەمێنێتەوە.
کێشەکە لە کوێدایە؟
ئەربێلوا: تەواوی وەرزەکەمان لەبەردەمدایە. ئەوەی من نیگەران دەکات ئەوەیە کە هەموو یاریزانەکان بەردەست بن و بتوانن لە ناو یاریگادا گوزارشت لە خۆیان بکەن و چێژ وەربگرن.
ئەربێلوا: هەڵگرتنی ئەم دروشمە (لۆگۆی ڕیاڵ مەدرید) باشترین شتە کە لە ژیانتدا ڕوو بدات، تا ئەو کاتەی ڕیاڵ مەدرید بییەوێت من لێرە بەردەوام دەبم.
چۆن مامەڵە لەگەڵ "خۆپەرستی و شانازی" یاریزانەکان دەکەیت لە ژووری جلگۆڕین؟
ئەربێلوا: ئەمە شتێک نییە نیگەرانم بکات، ئێمە کۆمەڵێک یاریزانی پیشەگەری گەورەمان هەیە، هەموویان گەنجی باشن و ئارەزووی ئەوەیان هەیە کارەکان بە دروستی ئەنجام بدەن. دەزانم یاریزان بوون لە ڕیاڵ مەدرید واتای چییە و پێویستی بە چییە. ئەم بەیانییە پێم وتن کە باشترین ماوەی ژیانم ئەوە بوو کە یاریزانی ڕیاڵ مەدرید بووم.
جوزێ مۆرینیۆ؟
ئەربێلوا: دەمزانی ئەم پرسیارە دەکرێت، هێشتا قسەم لەگەڵ جوزێ نەکردووە. جێگەی شانازی بوو کە لەژێر سەرپەرشتی ئەودا یاری بکەم، کاریگەرییەکی زۆری لەسەرم هەبووە. بەڵام من "ئەلفارۆ ئەربێلوا" دەبم، و هەرگیز لە شکست نەترساوم.
ئەلفارۆ ئەربێلوا: ئەگەر بمەوێت ببمە جوزێ مۆرینیۆ، ئەوا بە خراپی شکست دەهێنم.
ئایا بەهۆی هاوڕێیەتیت لەگەڵ چابی ئەلۆنسۆ دوودڵ بوویت لە قبوڵکردنی ئەرکی ڕاهێنەرایەتی ڕیاڵ مەدرید؟
ئەربێلوا: ئەو هیوای هەموو سەرکەوتنێکی بۆ خواستم، هەروەک چۆن منیش بۆ ئەوم دەخواست. هاوڕێیەتی لە سەروو هەموو شتێکەوەیە، بۆ ماوەیەکی باش قسەمان کرد و هیوای سەرکەوتنی بۆ خواستم. من و چابی هەمیشە پێکەوە دەمێنینەوە.
ئامادەکاری جەستەیی پینتۆس؟
ئەربێلوا: جێگەی شانازییە کە "پینتۆس"مان هەیە، ئەو خاوەنی ٥ نازناوی چامپیۆنزلیگە و ڕاهێنەرێکی جەستەیی ناوازەیە. پینتۆس زۆرێک لە یاریزانەکان دەناسێت و خاوەنی شێوازێکی تایبەتە کە لەم یانەیەدا سەرکەوتنێکی گەورەی بەدەستهێناوە. بوونی پینتۆس لێرە چانسێکی گەورەیە بۆ من و بۆ یاریزانانی ڕیاڵ مەدرید.
وەسفت بۆ ڕیاڵ مەدرید چییە؟
ئەربێلوا: هیچ شتێک نییە وەسفی بکات، ڕیاڵ مەدرید واتە بردنەوە، بردنەوە، و بردنەوە؛ ئەمە ڕێبەر و ئامانجی ئێمەیە. وەک یاریزانێک هەموو ئەو بەهایانەم لە خەڵکەوە وەرگرتووە کە تا ئەمڕۆش هەر ماون.
گۆڕینی ڤینیسیۆس لە کلاسیکۆدا تۆ چۆن ڕەفتارت دەکرد؟
ئەربێلوا: من خۆم ناخەمە ناو هیچ گریمانەیەکەوە کە هێشتا ڕووی نەداوە، من بەختەوەرم کە ڤینیسیۆس لەگەڵمندایە.
چابی ئەلۆنسۆ لە یەکەم کۆنگرەی خۆیدا وتی کە شێوازی یاریکردنی "ڕۆک ئەند ڕۆڵ"ی دەوێت، ئەی تۆ؟
ئەربێلوا: فەلسەفەی من بەدەستهێنانی سەرکەوتنە، ئەمە هەمان ئەو فەلسەفەیەیە کە ئەم یانەیەی کردووەتە سەرکەوتووترین یانە لە مێژووی تۆپی پێدا.
ئەربێلوا: بیر لەوە دەکەمەوە سبەینێ بە باشی دەست پێبکەم و هیچ شتێکی تر سەرقاڵم ناکات، دەبینم ئێوەش زۆر نیگەران نین.
ئەربێلوا: هەموو یاریزانەکان لە سفرهوە دەست پێدەکەن، ئەمە سەرەتایەکی نوێیە.