جیانی ئینفانتینۆ، سەرۆکی فیفا، لە کاردانەوەیەکدا بەرامبەر بە ئاستە بەرزەکەی لیۆنێل مێسی لە مۆندیالی 2026، ستایشی ئەو ئەستێرە ئەرجەنتینییەی کرد و پیرۆزبایی ژمارەیەکی پێوانەیی مێژوویی لێکرد.
سەرۆکی فیفا لە ڕێگەی هەژماری فەرمیی خۆی لە تۆڕی کۆمەڵایەتی ئینستاگرام، پەیامێکی ئاراستەی کاپتنی هەڵبژاردەی ئەرجەنتین کرد و تێیدا هاتبوو:
"دووبارە پیرۆزبێت لیۆنێل مێسی! تۆ ژمارەیەکی پێوانەیی نوێت تۆمار کرد دوای ئەوەی بوویت بە یەکەم یاریزان لە مێژووی تۆپی پێدا کە لە 7 یاری لەسەر یەکی جامی جیهانیدا گۆڵی تۆمار کردبێت."
ئینفانتینۆ لە کۆتایی پەیامەکەیدا ئاماژەی بە ئاستی یاریزانەکە کرد و وتی: "تۆ ئاستێکی سەرسوڕهێنەرت لە قۆناغی کۆمەڵەکان پێشکەش کرد، هیوای سەرکەوتنت بۆ دەخوازم لە قۆناغەکانی داهاتوودا."
جێگای ئاماژەیە، مێسی بەردەوامە لە شکاندنی ژمارە پێوانەییەکان و لەم مۆندیالەشدا بە تۆمارکردنی 6 گۆڵ، پێشەنگی گۆڵکارانی گرتووە و بووەتە جێگای سەرنجی سەرجەم میدیا جیهانییەکان.