تیما یانەیا زێرەڤانیێ دووەم سەركەفتن ل سەر دویڤ توماركر، پشتی سەركەفتنەكا گرنگ ل سەر مێڤانا خو یانەیا ئارارت توماركری د یاریێن گەرا (2)دا ژ قویناخا (2) ژ خولا نایابا فاستلینكا كوردستانێ یا تەپا پێی ب دوو گولان بەرامبەر گولەكێ د وێ یاریێدا ئەوا ل یاریگەها زێرەڤانیێ هاتیەكرن.
د نیڤا ئێكێدا، هەڤركیەكا بهێز دناڤبەرا یاریكەرێن هەردوو تیماندا پەیدابوو و چەند دەرفەتەكێن گولكرنێ پەیدابوون، بەلێ مفا ژێ نەهاتە دیتن تاكو دەقیقا (31) دەمێ یاریكەرێ زێرەڤانیێ (ئەیوب ئەیاد) شیایی گولا پێشكەفتنێ بو یانەیا خو تومار بكەت، بەلێ هند پێڤە نەچوو، ب تنێ پشتی بورینا (4) دەقیقان، یاریكەرێ ئارارات (عەلی عەزیز) ژ لێدانەكا ئێكسەر شیا ئەنجامی وەكهەڤ لێ بكەت و ئەڤ نیڤە ب وەكهەڤیا هەردوو تیمان ب گولەكێ بدویماهی هات.
د نیڤا دووێدا ئاستێ یاریێ باشتر لێهات و تا راددەیەكێ یاریەكا زڤر دهاتەكرن، و ل دەقیقا (65) یاریكەرێ زێرەڤانیێ (بیلال سالح) شیا گولا دووێ و سەركەفتنێ بو یانەیا خو تومار بكەت و ل دەمێ مایێ یاریكەرێن ئارارت پێكولا وەكهەڤیكرنا ئەنجامی دكر، بەلێ چ پێكولێن وان سەرنەگرتن و یاری ب سەركەفتنا زێرەڤانیێ ب دوو گولان بەرامبەر گولەكێ بدویماهی هات.
ب ڤێ سەركەفتنێ هەژمارا خالێن زێرەڤانیێ بوونە (9) خال و پێشڤە هاتە رێزا (4) د كوما ئێكێدا و هەژمارا خالێن ئارارات ژی هەر مان (8) و پاشڤە زڤری رێزا (5) د كومێدا.
SPEE SPORT- KFA