ئەوەشی خستەڕوو، پێش چەند رۆژێک داعش هێرشی بۆ سەر چەند شوێنێک لە دەوروبەری کەرکوک و کفری و کەلار کرد. لە ئەنجامدا چەندین پێشمەرگە و هاوولاتی گیانیان لەدەست دا، شەوی ٢ی ئەم مانگەش هێرشیان کردە سەر گوندی خدرجیجەی شارۆچکەی مەخمور و  ژمارەیەک پێشمەرگەو خەڵکی سڤیلی گوندەکەیان شەهید کرد. ئێمە وەک کۆنگرەی نەتەوەیی کوردستان هاوبەشی خەمی خانەوادەی قوربانیانین و سەرەخۆشی لە ئەوان و تەواوی خەڵکی کوردستان دەکەین.

ئاماژەی بەوەشکردووە" لە لایەکی ترەوە هەموو دەزانین ماوەیەکی درێژە داعش لە دەوروبەری کەرکوک و گەرمیان و قەرەچوغ و ئەو ناوچانە، خەریکی خۆرێکخستنەوەو پلانی هێرشکردنە، بێگومان ئەو هێرشانە چاوەڕوانکراو بوون، بەڵام ئەوەی جێی داخە خەمساردی و نائامادەکاریی هێزەکانی ئەو ناوچانەیە، بە داخەوە حکومەتی هەرێمی کوردستان لەو بارەیەوە کەمتەرخەم و بێ ئامادەکارییە". 

کەنەکە دەشڵێت" ئاشکرایە خەڵکی ئەو ناوچە سنووریانەی کوردستان هەمیشە لە ژێر هەڕەشە و پەلامارداندان، ئەمە تەنیا پەیوەندی بە پارت و هێزێکی تایبەتەوە نییە، ئەمە پرسی هەموو خەڵکی کوردستانە، لەبەرئەوە پێویستە هەموو هێزە کوردستانییەکان لە بەرامبەر ئەو ناوچانەدا خۆ بە بەرپرسیار بزانن و یەکڕیز بن، بەرپرسیاریتی یەکەمیش ئەکەوێتە ئەستۆی حکومەتی هەرێم، پێویستە لەو رووەوە بە زووترین کات هەموو ئامادەکارییەک بکات.

لە بەشێکی تری ڕاگەیەندراوەکەدا کۆنگرەی نەتەوەیی کوردستان داوا لە هەموو ئەندامانی خۆیان و سەرجەم پارت و هێزە کوردستانییەکان دەکات" کە بە هەموو توانای خۆیانەوە لە پاراستنی خەڵکی ئەو ناوچانەدا بەشداری کارا بن".