دوو لیژنەی پەڕلەمانی كوردستان داوا دەكەن، بەشێوەیەكی خێراتر كار لەسەر ڕاسپاردەكانمان بكرێت
بۆ داماڵینی چەكی بێ مۆڵەت.
ئەمڕۆ ٥ی کانوونی یەکەم، لیژنەی داكۆكیكردن لەمافی
ژنان و لیژنەی كاروباری كۆمەڵایەتی و داكۆكیكردن لە مافی مرۆڤ لە ڕاگەیەنراوێكدا بڵاویانكردەوە، شەوی ڕابردوو لە ئەنجامی بەجێگەیاندنی ئەركی یاسایی خۆیاندا، مەفرەزەیەكی
بەڕێوبەرایەتی بەرەنگاربوونەوەی توندوتیژی دژی ژنان و خێزان لەسلێمانی ڕووبەڕووی ڕووداوێكی
تەقەكردن بوونەوە و ئەفسەرێك بەپلەی نەقیب گیانی سپارد و سێ كارمەندی دیكەش برینداربوون.
ئەو دوولیژنەیە ڕاشیانگەیاند "دەبێت هەرچی
زووە تاوانكاران و ئەنجامدەرانی ئەو كارە ڕووبەڕووی یاسا بكرێنەوە و سزای توند بدرێن،
بەشێوەیەكی خێراتریش كار لەسەر ڕاسپاردەكانمان بكرێت بۆ داماڵینی چەكی بێ مۆڵەت و
پێداچوونەوە و تووندكردنی پێدانی مۆڵەت بۆ كەمكردنەوە و بەڕەنگاربوونەوەی لەمجۆرە ڕووداوانە".