سەرۆک کۆماری تورکیا ڕایدەگەیەنێت" هاوئاهەنگیمان لەگەڵ حکومەتی عێراق هەیە بۆ بەڕێوەچوونی ئۆپەراسیۆنەکەمان".
ڕەجەب تەیب ئەردۆغان سەرکۆماری تورکیا ئەمڕۆ لە کۆبوونەوەی فراکسیۆنی پارتەکەیدا لە پەرلەمانی تورکیا وتارێکی پێشکەش کرد و ڕایگەیاند" چاومان لە خاکی هیچ وڵاتێک نییە، بەڵام دەمانەوێت ئاسایش بەرقەرار بکەین".
ئەوەشی خستەڕوو، بەهۆی ئۆپەراسیۆنەکانمان بۆ نێو بنکە و بارەگاکانیان چەندین ساڵە پەکەکە ناتوانێت هیچ چالاکییەک لەنێو تورکیادا بکات و لە چالاکیمان خستوون و بەردەوام دەبین.
دەشڵێت" ئامانجمان لە ئۆپەراسیۆنی (کلیل-چنگ) داماڵینی خاکی عێراقە لە پەکەکە، هەروەها گەرەنتیکردنی ئاسایشی سنووری وڵاتەکەمانە".
ئەردۆغان لە بەشێکی تری وتارەکەیدا جەختیشیکردەوە، بە هەماهەنگی لەگەڵ حکومەتی عێراق ئۆپەراسیۆنەکانمان دەکەین و سوپاسی حکومەتی فیدراڵ و هەرێمی کوردستان دەکەین.
دوێنێ وەزارەتی دەرەوەی عێراق باڵیۆزی تورکیای لە بەغداد بانگهێشت کرد و یاداشتێکی ناڕەزایەتی لەبارەی هێرشە بەردەوامەکانی سوپای تورکیا ئاراستەی حکومەتی ئەنقەرە کرد و وتی" حكومه‌تی عێراق به فه‌رمی داوای له توركیا كردوه هه‌موو هێزه سه‌ربازه‌كانی له خاكی عێراق بكشێنێته‌وه و رێز له سه‌روه‌ری خاكی عێراق بگرێت".
وه‌زاره‌تی ده‌ره‌وه‌ی عێراق باسی له‌وه‌شكردبوو، عێراق مافی خۆیەتی رێوشوێنی پێویست و گونجاو بگرێتەبەر بەپێی بەندەکانی نەتەوە یەکگرتوەکان و یاساکانی نێودەوڵەتی، کە به پێی مادده‌ی (٥١)ی دەستوری نەتەوە یەکگرتوەکان، نابێت سه‌روه‌ری هیچ ده‌وڵه‌تێك پێشێل بكرێت.