یەكێتی نیشتمانی كوردستان و بزووتنەوەی گۆڕان رایدەگەیەننن هەمواركردنەوەی یاسای هەڵبژاردنی پەرلەمانی كوردستان بۆتە خواستێكی جەماوەریی.
ئەمڕۆ وەفدێكی باڵای یەكێتی نیشتیمانی كوردستان بەسەرپەرشتی ڕزگار عەلی كارگێڕی مەكتەبی سیاسی و ئامادەبوونی ئەمین بابەشێخ و د.میران محەمەد عەباس ئەندامانی مەكتەبی سیاسی حەمەی حەمەسەعید و سالار سەرحەد خەلیفە، ئەندامانی سەركردایەتی، سەردانی مەكۆی سەرەكی بزوتنەوەی گۆڕانیان كرد لە سلێمانی، و لەلایەن ژمارەیەك لە ئەندامانی جڤاتی نیشتیمانی پێشوازیان لێكرا.
بەپێی راگەیەنراوی كۆبوونەوەكە، لەو دیدارە رەوشی سیاسی هەرێمی كوردستان و عێراق، ژیان و گوزەرانی هاوڵاتیانی كوردستان و مووچەخۆران گفتوگۆیان لەبارەوە كرا و هەردوولا جەختیان كردەوە دۆخی چەقبەستوی سیاسی نێوان لایەنەكان، پێشهاتێكی مەترسیدارە بۆ تێكدانی یەكریزی نێوان لایەنەكان و پرۆسەی سیاسی هەرێمیش بۆیە هەرچی زووە دەبێت ئەو بەربەستانەی كە لەبەردەم لێكنزیك بوونەوەی لایەنەكانە لاببرێن.
هەروەها هاتووە "پرسی هەموواركردنەوەی یاسایی هەڵبژاردنەكان كە بۆتە خواستێكی جەماوەری و گشتگیر لەسەرانسەری هەرێمی كوردستاندا، هەڵوێستی هاوبەشی نیشتیمانی بۆ گەڵاڵە بكرێت و دەستكەوتەكان بپارێزین".