مه‌فره‌زه‌كانی‌ بنكه‌ی‌ پۆلیسی‌ ڕزگاری‌ لە سلێمانی چوار تۆمه‌تباریان ده‌ستگیركرد كه‌ به‌ چه‌قۆ هێرشیانكردبووه‌ سه‌ر هاوڵاتییەک و برینداریان كردبوو. 

ئەمڕۆ دووشەممە ٢٣ی ئایار، بەڕێوەبەرایەتی پۆلیسی سلێمانی ڕایگەیەند " دوای‌ ئه‌وه‌ی‌ له‌ڕووداوێكدا له‌سنوری‌ بنكه‌ی‌ پۆلیسی‌ ڕزگاری‌ چوار تۆمه‌تبار به‌چه‌قۆ هێرشیانكردبووه‌ سه‌ر كه‌سێك ‌و برینداریان كردبوو، ده‌ستبه‌جێ هێزه‌كانی‌ پۆلیس گه‌یشتنه‌ شوێنی‌ ڕووداوه‌كه ‌و لێكۆڵینه‌وه‌كانیان ده‌ستپێكرد، دواتر توانرا له‌ماوه‌یه‌كی‌ كه‌مدا چوار تۆمه‌تبارەکە له‌لایه‌ن مه‌فره‌زه‌كانی‌ بنكه‌ی‌ پۆلیسی‌ ڕزگارییه‌وه ده‌ستگیربكرێن و دەست به‌سه‌ر ئه‌و چه‌قۆیه‌دا بگیرێت كه‌ تۆمه‌تباره‌كان له‌كاتی‌ تاوانه‌كه‌یاندا به‌كاریانهێنابوو ".

هەر لە راگەیەندراوەکەدا ئەوەش خراوەتەڕوو " هه‌ر چوار تۆمه‌تبار (ه،ج،ٱ لەدایکبووی 1979 _ ٱ،ج،ح لەدایکبووی 1988 _  ج،ع،ع لەدایکبووی 1995_  ٱ،ٱ،س لەدایکبووی 1998) به‌بڕیاری‌ دادوه‌ر و به‌پێی‌ مادده‌ی‌ 31/405 ڕاگیراون ‌و لێكۆڵینه‌وه‌ له‌گه‌ڵیاندا به‌رده‌وامه ".